Cavani, Mbappe og Di Maria sáu um Rennes

PSG eru áfram ósigraðir í frönsku úrvalsdeildinni, Ligue 1, eftir þægilegan 4-1 sigur á Rennes á Parc des Princes leikvanginum í París í kvöld.

Edinson Cavani hefur verið heitur að undanförnu og hann kom PSG yfir á sjöundu mínútu en Mbaye Niang jafnaði metin fyrir gestina á 28. mínútu. Niang lék á tíma með Watford meðal annars.

Eftir klukkutíma leik komst PSG aftur yfir en þar var á ferðinni Argentínumaðurinn Angel Di Maria og sex mínútum síðar skoraði hinn magnaði Kylian Mbappe þriðja mark PSG.

Cavani bætti svo við einu marki áður en yfir lauk og lokatölur 4-1 sigur PSG sem er með átján sigra og tvö jafntefli í fyrstu tuttugu leikjunum í Frakklandi.

Þeir eru með 56 stig í tuttugu leikjum en í öðru sætinu er Lille með 43 stig eftir 22 leiki. Rosalegir yfirburðir Parísar-liðsins.