Arnautovic vill komast til Kína

Marko Arnautovic, framherji West Ham, vill að félagið taki 35 milljón punda tilboði frá kínversku félagi í sig en Hamrarnir segja að hann sé ekki til sölu.

West Ham fékk þetta rausnarlega tilboð í Austurríkismanninn frekar óvænt í vikunni en ekki hefur verið gefið upp hvaða kínverska félag vill kaupa hann.

Arnautovic og umboðsmaður hans, sem er bróðir hans, hafa biðlað til West Ham að taka tilboðinu. Þeir vilja komast í peningana í Kína. Ekki var vel tekið í þá bón.

Arnautovic kom til West Ham frá Stoke sumarið 2017 og kostaði þá 20 milljónir punda. Hann er með samning fram á sumar 2022.

Kínverska félagið er sagt vera til í að greiða Austurríkismanninum 200 þúsund pund á viku í fjögur ár. Það er mikil launahækkun.