Sport

Sara í miklu stuði og vann sjöttu greinina

Óskar Ófeigur Jónsson skrifar
Sara Sigmundsdóttir er að gera frábæra hluti í Dúbaí.
Sara Sigmundsdóttir er að gera frábæra hluti í Dúbaí. Mynd/Fésbókarsíða Dubai CrossFit Championship

Sara Sigmundsdóttir er komin með 26 stiga forystu í toppsætinu á CrossFit mótinu í Dúbaí eftir sinn annan sigur í síðustu þremur greinum.

Sara byrjaði rólega á Dubai CrossFit Championship en eftir erfiðan frysta dag hefur hún verið í miklu stuði í síðustu greinum.

Sara vann sjöttu greinina og fékk fyrir það hundrað stig. Sara er því komin með 527 stig samtals eftir að hafa náð 295 stig af 300 mögulegum í síðustu þremur greinum.

Sara er með 26 stigum meira en Slóvakinn Karin Frey sem er í öðru sæti í heildarstigakeppninni með 501 stig. Alessandra Pichelli frá Ítalíu er síðan þriðja með 472 stig eða 54 stigum á eftir Söru.

Það er nóg eftir af keppninni en síðasta grein dags fer fram seinna í dag. Eins og er lítur þetta út fyrir að ætla að vera keppni á milli Söru og Slóvakans.

Sjötta greinin var þrískipt hraðagrein með þremur mismunandi snörunum. Sara brunaði í gegn og kláraði á einni mínútu og sjö sekúndum. Hún var tveimur sekúndum á undan Ítalanum Alessöndru Pichelli sem varð önnur í greininni. Karin Frey varð síðan þriðja á einni mínútu og ellefu sekúndum.

Samantha Briggs var efst fyrir daginn og í öðru sæti eftir fyrstu grein dagsins en hún náði aðeins 17. sæti í sjöttu greininni og er dottin niður í fimmta sætið.

Eik Gylfadóttir varð fimmtánda í sjöttu greininni og er nú komin upp í sautjánda sætið eftir að hafa byrjað daginn í 22. sæti.

Það má fylgjast með keppni dagsins í beinni útsendingu með því að smella hér.

Stigahæstu konurnar eftir sex greinar eru:
1. Sara Sigmundsdóttir, Íslandi 527
2. Karin Frey, Slóvakíu 501
3. Alessandra Pichelli, Ítalíu 472
4. Gabriela Migala, Póllandi 467
5. Samantha Briggs, Bretlandi 466
6. Jamie Greene, Ástralíu 452
7. Emily Rolfe, Kanada 445
8. Julie Hougård, Danmörku 440


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.