Viðskipti innlent

Efling skorar á Ölgerðina að stytta vinnuviku allra

Andri Eysteinsson skrifar
Sólveig Anna skoraði á Ölgerðina í bréfi til forstjóra.
Sólveig Anna skoraði á Ölgerðina í bréfi til forstjóra. Vísir/Vilhelm

Stéttarfélagið Efling hefur sent Andra Þór Guðmundssyni, forstjóra Ölgerðarinnar, áskorun í kjölfar umfjöllunar um málefni starfsmanna í vikunni. Vísir greindi frá að starfsmönnum Ölgerðarinnar sem voru meðlimir í VR hafi verið boðaðir á fund forsvarsmanna. Var starfsmönnum þar boðnir þrír kostir, ganga úr VR og í Eflingu, halda sér í VR en vinna samkvæmt Eflingu eða vera sagt upp frá og með síðustu mánaðamótum með þriggja mánaða uppsagnarfresti.

Sjá einnig: Svona leit bréfið til starfsmanna Ölgerðarinnar út

Í bréfi sínu til forstjóra Ölgerðarinnar segir Sólveig Anna Jónsdóttir, formaður Eflingar, að þó núgildandi kjarasamningur Eflingar og SA skapi Ölgerðinni ekki skyldu um að stytta vinnuvikuna um níu mínútur líkt og í samningi VR sé ekkert því til fyrirstöðu að fyrirtæki veiti þeim sem starfi undir öðrum samningum sömu styttingu. Einnig sé í kjarasamningi Eflingar og SA að finna sérstakar heimildir til þess að framkvæma slíka styttingu.

„Með hliðsjón af ofangreindu skora ég f.h. Eflingar – stéttarfélags á þig að veita starfsmönnum sem starfa samkvæmt kjarasamningi Eflingar sams konar styttingu og þeim sem starfa samkvæmt samningi VR,“ segir í bréfi Sólveigar Önnu til Andra Þórs dagsettu í dag, 6. desember 2019.

Þá segir einnig í bréfinu að fyrir hönd Eflingar fagni formaðurinn leiðréttingu félagsaðildar starfsmanna þar sem sumir starfsmannanna hafi unnið störf sem falla heldur undir samningsvið Eflingar en VR.

Andri Þór Guðmundsson er forstjóri Ölgerðarinnar.

„Samkvæmt heimildum mínum hefur Ölgerðin um árabil lagt blessun sína yfir félagsaðild umræddra starfsmanna að VR í skriflegum ráðningarsamningum og greitt stéttarfélagsgjöld af þeim til VR,“ segir í bréfinu. Með þessu hafi Ölgerðin, að dómi Sólveigar Önnu, gefið starfsmönnunum fyrirheit um að þeir fái notið kjara samninga VR, séu þeir samningar betri en samningar Eflingar í einhverjum atriðum.

„Tómlæti Ölgerðarinnar gagnvart leiðréttingu félagsaðildar skapar að mínum dómi gild réttlætisrök fyrir því að fyrirtækið veiti umræddum starfsmönnum kjarabætur sem haldast í hendur við þá stéttarfélagsaðild sem fyrirtækið hefur samþykkt árum saman athugasemdalaust,“ segir í bréfinu.

Fyrr í vikunni sagði Stefán Sveinbjörnsson, framkvæmdastjóri VR, í kvöldfréttum Stöðvar 2 að Ölgerðin væri eina fyrirtækið þar sem reynt hafi að færa fólk úr einu stéttarfélagi í annað til þess að sleppa undan styttingu vinnuvikunnar.

Í yfirlýsingu Ölgerðarinnar sagði þó að fyrirtækið hefði skriflega staðfestingu frá VR um að starfsmennirnir njóti betri kjara hvað vinnutíma og laun varði en Lífskjarasamningurinn kveði á um.

Sjá einnig: Segja starfsmenn þegar með styttri vinnuviku

Enn fremur segir í yfirlýsingunni síðustu daga hafi verið unnið að samræmingu innan deilda meðal starfsmanna lagers og bílstjóra. Tilgangurinn hafi verið að freista þess að allir starfsmenn hverrar deildar fyrir sig tækju kjör og réttindi eins stéttarfélags. Mikilvægt sé að ef breytingar verði á samningum gangi það sama yfir alla.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
ICEAIR
2,97
21
102.289
FESTI
2,84
16
385.019
MAREL
2,39
26
506.488
BRIM
2,37
6
62.304
VIS
2,13
17
431.999

Mesta lækkun dagsins


Félag
Br.%
Fjöldi
Velta*
EIM
-1,37
2
27.000
ARION
-1,24
25
330.100
LEQ
-0,92
4
131.254
SYN
-0,27
1
2.092
Velkomin á Vísi. Þessi vefur notar vafrakökur. Sjá nánar.