Erlent

Trump fordæmdur fyrir að dreifa rakalausri samsæriskenningu um dauða Epstein

Kjartan Kjartansson skrifar
Trump Bandaríkjaforseti básúnaði samsæriskenningu um dauða Epstein til milljóna fylgjenda sinna á Twitter. Engin rök eru að baki henni.
Trump Bandaríkjaforseti básúnaði samsæriskenningu um dauða Epstein til milljóna fylgjenda sinna á Twitter. Engin rök eru að baki henni. Vísir/EPA

Frambjóðendur í forvali Demókrataflokksins fordæma Donald Trump Bandaríkjaforseta fyrir að hafa dreift rakalausri samsæriskenningu um að Bill Clinton, fyrrverandi forseti Bandaríkjanna, hafi átt þátt í dauða Jeffrey Epstein í fangelsi um helgina. Epstein, sem var sakaður um mansal og kynferðisbrot, fannst látinn í klefa sínum á laugardag.

Fjöldi samsæriskenninga um dauða Epstein hafa farið á flug síðustu daga. Epstein átti marga auðuga og valdamikla vini, þar á meðal Clinton og Trump sjálfan. Hann var handtekinn í síðasta mánuði og ákærður fyrir mansal á unglingsstúlkum á Flórída og í New York. Hann er talinn hafa svipt sig lífi í fangelsinu.

Trump forseti, sem haslaði sér völl í stjórnmálum með rasískri samsæriskenningu um að Barack Obama væri ekki fæddur í Bandaríkjunum og því ólögmætur forseti, var einn þeirra sem dreifði samsæriskenningu um dauða Epstein á netinu um helgina.

Áframtísti forsetinn hægrisinnuðum grínista sem dró í efa að Epstein hefði í raun svipt sig lífi. Hélt grínistinn því fram að Epstein hefði „haft upplýsingar um Clinton og nú er hann dauður“.

„Við vitum hver gerði þetta,“ sagði grínistinn Terrence K. Williams og hvatti fylgjendur sína til að áframtísta ef þetta „kæmi þeim ekki á óvart“. Með fylgdi mynd af bæði Bill og Hillary Clinton.



„Mjög hættulegur forseti“

Beto O‘Rourke, frambjóðandi í forvali demókrata fyrir forsetakosningarnar á næsta ári, sagði áframtíst Trump enn eitt dæmið um að hann notaði opinbert embætti sitt til að ráðast á andstæðinga sína með rakalausum samsæriskenningum. Það væri tilraun forsetans til að dreifa athyglinni frá skotárás í El Paso fyrir rúmri viku sem hann hefur verið sakaður um að bera ábyrgð á með hatrammri orðræðu gegn innflytjendum og hælisleitendum, að því er segir í frétt Reuters.

„Hann er að skipta um umræðuefni og ef við leyfum honum að gera það getum við aldrei einbeitt okkur að raunverulegu vandamálunum sem hann er hluti af,“ sagði O‘Rourke við CNN í gær.

Í svipaðan streng tók Cory Booker, öldungadeildarþingmaður demókrata frá New Jersey og frambjóðandi í forvalinu. Sagði hann áframtíst Trump „enn meiri glannaskap“ af hálfu forsetans.

„Hann gefur ekki aðeins samsæriskenningum líf heldur æsir fólk virkilega upp í reiði og verra gegn ólíku fólki í þessu landi,“ sagði Booker.

„Við höfum sé að lífi fólks er ógnað vegna þess að þessi forseti æsir til haturs. Þetta er mjög hættulegur forseti sem við höfum núna,“ sagði hann ennfremur.

Alríkislögreglan FBI og dómsmálaráðuneytið rannsaka nú dauða Epstein. Andlát hans hefur vakið upp spurningar um eftirlit í fangelsinu þar sem honum var haldið. Epstein fannst meðvitunarlaus á gólfi klefa síns með áverka á hálsi í síðasta mánuði. Það atvik var rannsakaða sem sjálfsvígstilraun. Engu að síður var hætt að fylgjast sérstaklega með honum vegna sjálfsvígshættu þegar hann fannst látinn á laugardag.

„Dauði herra Epstein vekur upp alvarlegar spurningar sem verður að svara,“ sagði William Barr, dómsmálaráðherra, í yfirlýsingu á laugardag.

Epstein átti yfir höfði sér áratugalanga fangelsisvist vegna mansals á ungum stúlkum. Vísir/AP

Rakalausar kenningar gegn Clinton og Trump á Twitter

Auk samsæriskenninganna um Clinton og Obama sakaði Trump föður Teds Cruz, mótherja síns í forvali repúblikana árið 2016, um að hafa átt þátt í morðinu á John F. Kennedy forseta. Cruz fordæmdi Trump þá sem lygara.

Samsæriskenningarnar um dauða Epstein hafa ekki aðeins verið bundnar við meinta aðild Clinton. Á samfélagsmiðlinum Twitter fór myllumerkið „Trump tala látinna“, að því er virðist sem svar við eldra myllumerk „Clinton tala látinna“, á flug.

Þeir sem þar tísta virðast sannfærðir um að gögn úr máli Epstein eigi eftir að bendla Trump við glæpi hans. Engar vísbendingar styðja samsæriskenningarnar um meinta aðild Trump annars vegar eða Clinton hins vegar að andlátinu.

Fleiri stjórnmálamenn hafa einnig gefið samsæriskenningum um dauða Epstein undir fótinn. Þannig sagði Bill de Blasio, borgarstjóri New York og frambjóðandi í forvali demókrata, að andlát Epstein væri „of hentugt“ og krafðist rannsóknar á því.

„Það sem mörg okkar viljum vita er: hvað vissi hann? Hversu margir aðrir milljóna- og milljarðamæringar voru hluti af því ólöglega athæfi sem hann stundaði?“ sagði de Blasio.




Tengdar fréttir

Segir sjálfsvíg Epstein „allt of heppilegt“

Bill de Blasio, borgarstjóri New York-borgar og forsetaframbjóðandi í forvali Demókrataflokksins fyrir næstu forsetakosningar, segir andlát bandaríska fjárfestisins og milljarðamæringsins Jeffrey Epstein "allt of hentugt“ og hefur kallað eftir ítarlegri rannsókn á tildrögum andláts hans. Epstein er sagður hafa fallið fyrir eigin hendi.

FBI rannsakar andlát Epsteins

Epstein er talinn hafa framið sjálfsvíg en hann var ákærður fyrir mansal og misnotkun á tugum stúlkna.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.