Handbolti

Strákarnir í átta liða úrslitin á HM eftir sannfærandi sigur

Óskar Ófeigur Jónsson skrifar
Íslenska 19 ára landsliðið.
Íslenska 19 ára landsliðið. HSÍ
Íslenska nítján ára landslið karla í handbolta er komið í átta liða úrslitin á HM U19 í Norður Makedóníu eftir sannfærandi fimm marka sigur á Japan í sextán liða úrslitum í dag.

Íslenska liðið vann leikinn 39-34 eftir að hafa verið þremur mörkum yfir í hálfleik, 16-13.

Tumi Steinn Rúnarsson var markahæstur í íslenska liðinu með 10 mörk úr 11 skotum og KA-maðurinn Dagur Gautason skoraði 8 mörk úr 9 skotum. Tumi Steinn, sem var valinn maður leiksins, var mjög öflugur í gegnumbrotunum en hann spilar með Aftureldingu. HK-ingurinn Eiríkur Guðni Þórarinsson var síðan með sjö mörk.

Haukur Þrastarson kom aftur inn í liðið og var með fjögur mörk en hann átti einnig fjölda stoðsendinga á félags síns. Móthaldarar töldu tólf stoðsendingar á kappann en hann var allt í öllu í sóknarleiknum þrátt fyrir að skjóta bara sex sinnum sjálfur á markið.

Íslensku strákarnir enduðu þar með fjögurra leikja sigurgöngu japanska liðsins sem kom á miklu flugi inn í þennan mikilvæga leik.

Íslenska liðið var með frumkvæðið allan tímann en japanska liðið gafst aldrei upp og hékk inn í leiknum. Sigur íslensku strákanna var þó aldrei í mikilli hættu enda voru margir að spila vel í dag.

Ísland mætir Egyptalandi í átta liða úrslitunum en sá leikur fer fram strax á morgun. Egyptar unnu sjö marka sigur á Slóvenum fyrr í dag.

Íslenska liðið var fimm mörkum yfir skömmu fyrir hálfleik en Japanir skoruðu tvö síðustu mörk hálfleiksins.

Íslenska liðið bætti aftur við forystuna í upphafi seinni hálfleik og munurinn var lengstum á milli fjögur til sex mörk.

Japanir reyndu að leysa leikinn upp í lokin með framliggjandi vörn en strákarnir leystu það mjög vel.



Leikmenn Íslands á HM U-19 karla:

Markmenn

1 Svavar Ingi Sigmundsson, KA

26 Sigurður Dan Óskarsson, FH

Útileikmenn

3 Dagur Gautason, KA

4 Arnór Snær Óskarsson, Valur

5 Goði Ingvar Sveinsson, Fjölnir

10 Tumi Steinn Rúnarsson, Afturelding

11 Stiven Tobar Valencia, Valur

14 Einar Örn Sindrason, FH

19 Hafsteinn Óli Ramos Rocha, Fjölnir

20 Guðjón Baldur Ómarsson, Selfoss

21 Tjörvi Týr Gíslason, Valur

22 Eiríkur Guðni Þórarinsson, HK

23 Jón Bald Freysson, Fjölnir

24 Blær Hinriksson, HK

25 Haukur Þrastarson, Selfoss

27 Ólafur Brim Stefánsson, Valur

Hér fyrir neðan er hægt að sjá upptöku frá leik Íslands og Japans.




Fleiri fréttir

Sjá meira


×