Vandamál á bakvið tjöldin ástæða þess að Trippier fór frá Tottenham

Kieran Trippier segir vandamál á bak við tjöldin hjá Tottenham hafa orðið til þess að hann yfirgaf félagið.

Enski bakvörðurinn fór til Atletico Madrid fyrr í sumar á þriggja ára samningi. Hann var lykilmaður í enska landsliðinu á HM síðasta sumar en náði sér ekki almennilega á strik með Tottenham í vetur.

„Það gerðust hlutir á bak við tjöldin hjá Tottenham, sem ég vil ekkert fara nánar út í, sem ég þurfti að komast í burtu frá,“ sagði Trippier við Sky Sports.

Trippier kom við sögu í 7-3 stórsigri Atletico á Real Madrid í Bandaríkjunum í nótt.

„Það hefur verið auðveldara en ég bjóst við að aðlagast. Strákarnir hafa tekið mér ótrúlega vel.“