Innlent

Graðfolinn glaði sem átti ekki að fæðast er núna sá hæst dæmdi

Kristján Már Unnarsson skrifar
Stóðhesturinn Leynir kannar hryssurnar á Garðshorni á Þelamörk í Hörgárdal.
Stóðhesturinn Leynir kannar hryssurnar á Garðshorni á Þelamörk í Hörgárdal. Stöð 2/Arnar Halldórsson.

Eitt skærasta ungstirni íslenskra stóðhesta varð til fyrir slysni og fæddist án þess að eigendurnir hefðu hugmynd um að von væri á honum. Hann er sá hæst dæmdi meðal fjögurra vetra hesta í ár, kemur úr Hörgárdal en sjá mátti gæðinginn í fréttum Stöðvar 2. 

Leynir frá Garðshorni heitir þetta nýjasta ungstirni og hann gæti orðið áberandi nafn í íslenskum hrossaræktarbókum. Bærinn er á Þelamörk en þegar við komum heim á hlað til að heilsa upp á bændurna var Agnar Þór Magnússon í heyskap úti á túni meðan Birna Tryggvadóttir kenndi börnum á reiðnámskeiði.

Reiðnámskeið fyrir börn stóð yfir í reiðhöllinni á Garðshorni. Stöð 2/Arnar Halldórsson.

Þau eru með eigin reiðhöll enda hrossarækt aðalbúgrein þeirra ásamt sauðfjárrækt. 

En svo sýnir Birna okkur ungan graðfola sem hún sleppir inn í stóðhestagirðinguna og þeim sem horfa á frétt Stöðvar 2 er bent á að taka eftir ákafanum þegar hann hleypur í átt að hryssunum um leið og hann hneggjar. 

„Þetta er nú svolítið skondin saga um þennan hest því að hann er sem sagt slysafang,“ segir Birna.

Birna Tryggvadóttir, bóndi á Garðshorni. Stöð 2/Arnar Halldórsson.

Faðir Leynis hafði óvart sloppið inn í stóðhestahólf fimm árum áður. 

„Og hann stalst í hóp og við sprautuðum hryssuna. Sem sagt; folaldið átti ekki að verða til. En það var bara einhvern veginn þannig að það hefur einhver þarna uppi gripið inn í og hann varð bara til.“ 

Þau höfðu raunar ekki hugmynd um að mamman væri fylfull fyrr en folaldið var fætt út í túni. Þessvegna fékk það nafnið Leynir en þeim leist í fyrstu ekkert á þetta slysaskot.

Leynir kominn á harðasprett í átt að hryssunum. Stöð 2/Arnar Halldórsson.

„En svo bara er þetta alger snillingur og hann bara svona óx og óx,“ segir Birna. 

„Þetta er allavega hæst dæmdi fjögurra vetra hesturinn í ár og einn af þeim hærri sem sýndir hafa verið,“ segir Agnar Þór. 

„Þetta er magnaður hestur og vonandi framtíðarstjarna,“ segir hann.

Agnar Þór Magnússon, bóndi á Garðshorni. Stöð 2/Arnar Halldórsson.

Birna segir skemmtilegt geðslag stærsta kost Leynis. Hann sé alltaf kátur og glaður. 

„Og það er eiginlega dýrmætasti eiginleikinn. Því ef að það er ekki, þó svo að gangtegundirnar séu fyrir hendi, þá nýtast þær ekki. En hann er svo glaður og gangtegundirnar líka fyrir hendi þannig að þetta smellur allt alveg rosalega vel.“ 

Hér má sjá frétt Stöðvar 2.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.