Innlent

Allir sem voru um borð íslenskir: Þrír úrskurðaðir látnir á vettvangi

Jóhann K. Jóhannsson skrifar
Frá vettvangi flugslyssins í Fljótshlíð. Eldur kom upp í vinstri væng flugvélarinnar þegar hún skall til jarðar.
Frá vettvangi flugslyssins í Fljótshlíð. Eldur kom upp í vinstri væng flugvélarinnar þegar hún skall til jarðar. Vísir/Stöð 2
Þrír sem létust, þegar flugvél með fimm manns innaborðs skall niður skammt frá flugvellinum í Múlakoti í Fljótshlíð í gærkvöldi, voru úrskurðaðir látnir á vettvangi. Tveir voru fluttir með þyrlum Landhelgisgæslunnar á sjúkrahús í Reykjavík og er líðan þeirra sögð stöðug. Allir sem voru um borð voru íslenskir.



Alls voru fimm um borð í flugvélinni þegar hún skall til jarðar og kom upp eldur í vinstri væng hennar. Slökkviliðsmenn frá Brunavörnum Rangárvallasýslu auk annarra viðbragðsaðila fóru á vettvang en á fimmta tug tóku þátt í aðgerðum á vettvangi sem Sveinn Kristján Rúnarsson, yfirlögregluþjónn hjá Lögreglunni á Suðurlandi, stýrði.



„Tilkynningin hljómaði þannig að hér hefði farið niður flugvél og að það væri eldur laus í henni og það var svo sem allt tiltækt lið hérna á svæðinu kallað til, segir Sveinn.



Þrír létust og tveir slösuðust alvarlega en þeir voru fluttir með sitthvorri þyrlu Landhelgisgæslunnar á Landspítalann í Fossvogi. Samkvæmt upplýsingum frá Lögreglunni á Suðurlandi eru líðan þeirra stöðug.

Sveinn Kristján Rúnarsson, yfirlögregluþjónn hjá Lögreglunni á Suðurlandi og fulltrúi Rannsóknarnefndar samgönguslysa ræða rannsókn málsins.Vísir/Jóhann K

Veður var gott þegar slysið varð



Er vitað hvað hér gerðist?



„Nei. Það er ekki komið á hreint hvað hér gerðist. Það er verið að vinna út bæði þeim gögnum sem við erum með og tala við þau vitni sem að voru að atvikinu og eins er verið að vinna á vettvangi,“ segir Sveinn.



Var veður gott á vettvangi?



„Það er búið að vera einmuna blíða í langan tíma og veðrið mjög gott,“ segir Sveinn.



Eitt vitni, svo vitað sé, var að því þegar flugvélin skall niður. Fulltrúar frá Rannsóknarnefnd samgönguslysa auk rannsóknarlögreglumanna frá tæknideild Lögreglunnar á Suðurlandi og höfuðborgarsvæðinu luku vettvangsrannsókn í Fljótshlíð snemma í morgun. Var flak flugvélarinnar flutt til Keflavíkur í morgun þar sem það verður rannsakað frekar að sögn Ragnars Guðmundssonar fulltrúa Rannsóknarnefndar samgönguslysa.

Fulltrúi Rannsóknarnfndar samgönguslysa á vettvangi flugsluyssins í Fljótshlíð í gær.Vísir/Jóhann K

Rannsókn getur tekið langan tíma

„Við erum að flytja flakið í skýlið okkar og það næsta sem tekur við er í rauninni hefja rannsókn á flaki og hin eiginlega frumrannsókn þar sem við byrjum að safna gögnum og taka viðtöl og svo framvegis,“ segir Ragnar.



Hafið þið upplýsingar um með hvaða hætti þetta slys bar að?



„Nei. Við erum ekki komin með nægilega góða mynd af því ennþá. Er ekki við því að búast að rannsókn á slysi sem þessu geti tekið langan tíma? Það er einfaldlega aðeins of snemmt að segja til um það en að öllu jöfnu taka svona stærri  rannsóknir töluverðan tíma,“ segir Ragnar.



Rætt hefur verið við vitni af atvikinu og aðstandendur fólksins og var viðbragðsteymi Rauða kross Íslands var virkjað sem veitti fólkinu sálrænan stuðning.

 

 

 

Flugvélin skráð erlendis

Vélin var fimm sæta, með tveimur hreyflum og af gerðinni PIPER PA-23 með skráningu erlendis. Sveinn Rúnar, yfirlögregluþjónn segir samfélagið í Fljótshlíð slegið vegna atburðarins.



„Hér er mikið og þétt samfélag hérna í Múlakoti af flugmönnum og þetta hefur vissulega áhrif. það er ekki langt í flugvöllinn í Múlakoti var flugvélin að koma inn til lendingar eða að taka á loft þegar slysið átti sér stað?  Það er svo sem verið að rannsaka hvað gerðist og nákvæmlega hver ferillinn var er ég ekki með að svo stöddu,“ segir Sveinn Kristján Rúnarsson, yfirlögregluþjónn hjá Lögreglunni á Suðurlandi.

Tengd skjöl


Tengdar fréttir

Rannsókn á vettvangi lokið

Þrír létust og tveir slösuðust alvarlega en þeir voru fluttir með þyrlu Landhelgisgæslunnar á Landspítalann í Fossvogi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.