Tíska og hönnun

Veik fyrir hvítum klæðum

Þórdís Lilja Gunnarsdóttir skrifar
Jenný Sulollari er heilluð af kvenlegum fatnaði og klæðist hér ljósbleikum samfestingi með hvíta slá yfir axlirnar frá Comma
Jenný Sulollari er heilluð af kvenlegum fatnaði og klæðist hér ljósbleikum samfestingi með hvíta slá yfir axlirnar frá Comma Fréttablaðið/Ernir

Jenný Sulollari er 25 ára nemi í viðskiptafræði við HÍ. Hún elskar útiveru og fjallgöngur og hefur yndi af því að fara í jóga. Með fram náminu starfar Jenný hjá JCC sem er bakvinnslufyrirtæki fyrir fjármálafyrirtækin.

Ertu áhugasöm um tískuna?

Já, ég spái alveg mikið í tískuna. Ég fylgist gjarnan með því sem er að gerast í tískuheiminum og hvaða tískubylgjur og trend eru í gangi.

Hvernig myndir þú lýsa stílnum þínum?

Hann er frekar klassískur og þægilegur. Ég elska að vera í fallegum kjólum og á gott kjólasafn en það getur orðið svolítið strembið að vera í þeim á Íslandi þar sem veðrið leyfir það sjaldnast.

Jenný á stórt kjólasafn en segir íslenskt veðurfar ekki bjóða upp á marga kjóladaga. Hún er sumarið holdi klætt í þessum blómlega kjól sem hún keypti í Bandaríkjunum Fréttablaðið/Ernir

Hver er helsti veikleiki þinn þegar kemur að tísku og útliti?

Ég er sjúk í hvítan fatnað og á það til að kaupa margar sambærilegar hvítar flíkur.

Notar þú fylgihluti og skart?

Nei, ég nota lítið af fylgihlutum en á mér uppáhaldshálsmen sem ég nota oft. Það er vatnsberamerkið sem lýsir mér vel og er mér kær gjöf frá kærastanum.

Hvar kaupir þú fötin þín?

Ég kaupi flest mín föt í Comma í Smáralind og svo á ég það til að versla á netinu. Nýjasta flíkin sem ég keypti er ljósbleikur og sumarlegur samfestingur frá Comma og hvít slá sem er í algjöru uppáhaldi.

Hver er tískufyrirmyndin?

Ég á enga sérstaka tískufyrirmynd en mér þykir mjög skemmtilegt að sjá fólk sem líður vel í því sem það klæðist og ber það vel. Hvað viltu að stíllinn segi um þig? Að ég sé snyrtileg, kvenleg og fáguð.

Í hvað ferðu þegar þú vilt stela senunni?

Eitthvað sem mér líður vel í og helst í ljósum litum.

Hver er uppáhaldsflíkin í skápnum?

Sumarlegur kjóll með doppum sem ég keypti fyrir tveimur árum í Comma.

Hver gaf þér besta ráðið þegar kemur að tísku?

Besta tískuráðið fékk ég frá ömmu minni og það er að vera samkvæm sjálfri mér og klæða mig eftir því sem mér líður best í.

Hér nýtur Jenný sumarsins í litríkum buxum og jakka úr Comma. Fréttablaðið/Ernir

Hvað er það dýrasta sem þú hefur nokkru sinni keypt þér á kroppinn? 

Það dýrasta sem ég hef keypt mér er ljósbleikur síðkjóll sem ég var í þegar ég keppti í Miss Universe Iceland árið 2017.

Hvað er fram undan hjá þér í sumar?

Að njóta íslenska sumarsins og náttúrunnar. Í því felst undirbúningur fyrir Reykjavíkurmaraþon, fjallgöngur, útivera og útilegur og svo er ég að reyna fá kærastann minn sem er golfkennari til að kenna mér meira í golfi. Það er einnig í kortunum að fara til Ítalíu í sumarlok. Þá mundi ég byrja í Mílanó og enda á Amalfi en þaðan er stutt yfir á heimaslóðir til að heimsækja ömmu mína sem býr í Albaníu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.