Naumt tap í fyrsta úrslitaleiknum hjá Martin

Martin Hermannsson og félagar í Alba Berlín töpuðu fyrir Bayern München í fyrsta leik úrslitarimmunnar um þýska meistaratitilinn í körfubolta í kvöld.

Gestirnir frá Berlín byrjuðu leikinn betur og komust í 11-0 áður en Bayern kom stigi á töfluna. Heimamenn vöknuðu þá til leiks og söxuðu niður forskotið hægt og rólega. Í hálfleik var staðan 36-37 fyrir Alba Berlin.

Seinni hálfleikur var mjög spennandi. Þriðji leikhluti var hnífjafn en í upphafi þess fjórða tókst Alba að koma sér upp smá forskoti og leiddi með sex stigum þegar um fimm mínútur voru eftir.

Bayern var hins vegar sterkara á endasprettinum og náði að jafna 68-68 þegar ein og hálf mínúta voru eftir. Þegar upp var staðið fóru heimamenn með 74-70 sigur.

Martin spilaði rúmar 26 mínútur og skilaði 5 stigum, 4 fráköstum og 3 stoðsendingum.

Liðin mætast öðru sinni á heimavelli Alba á miðvikudaginn, 19. júní. Fyrsta liðið til þess að vinna þrjá leiki verður Þýskalandsmeistari.