Haukur kominn í sumarfrí
Haukur Helgi Pálsson og félagar í Nanterre 92 eru komnir í sumarfrí eftir stórt tap fyrir Lyon-Villeurbanne í undanúrslitum frönsku úrvalsdeildarinnar í körfubolta.
Nanterre var með bakið upp við vegg eftir tap í fyrstu tveimur leikjunum í einvíginu og þurfti að sækja sigur í kvöld til að halda lífi í einvíginu.
Það átti þó ekki eftir að koma á daginn, Lyon var miklu sterkari aðilinn í fyrsta leikhluta og leiddi 32-18 eftir hann. Í hálfleik var staðan 33-58 og ljóst í hvað stefndi. Þegar upp var staðið lauk leiknum með 99-56 tapi Nanterre.
Haukur Helgi náði sér ekki á strik, frekar en aðrir leikmenn Nanterre, hann skoraði tvö stig í leiknum og tók tvö fráköst.
Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
