„Æstir og ölvaðir“ menn til vand­ræða í mið­borginni

Lögreglu á höfuðborgarsvæðinu bárust í gærkvöldi ítrekaðar tilkynningar um „æstan og ölvaðan mann“ sem var til vandræða í miðborg Reykjavíkur.

Í dagbók lögreglu segir að maðurinn hafi gengið á milli staða og áreitti gesti og starfsfólk. Fannst hann síðan í verslun þar sem hann var búinn að troða ýmsum vörum inná sig. Hann var handtekinn og vistaður í fangageymslu.

Í dagbók lögreglu segir einnig frá því að óskað hafi verið eftur aðstoð lögreglu á skemmtistað í miðborginni skömmu eftir klukkan þrjú í nótt. „Ölvaður og æstur maður hafði brotið rúðu og ráðist að dyravörðum (minniháttar áverkar). Hann hrækti síðan á lögreglumann við afskipti. Handtekinn og vistaður í fangageymslu.“

Upp úr klukkan fjögur var aftur óskað eftir aðstoð lögreglu á skemmtistað í miðborginni vegna líkamsárásar. Mjög ölvaður gerandi handtekinn á vettvangi og vistaður í fangageymslu. Minniháttar áverkar á þolanda.  

Þá var tilkynnt um bifjólaslys á Bústaðavegi um klukkan 20:40 í gærkvöldi. Var ökumaður fluttur með sjúkrabíl á Landspítala og er hann talinn úlnliðsbrotinn. Bifhjólið er mikið skemmt. Um klukkan 22 var svo tilkynnt um annað bifhjólaslys, nú á Höfðabakkabrú. Þar er ökumaður talinn handleggs- og rifbeinsbrotinn.

Ennfremur segir frá umferðarslys í miðborginni þra sem ekið var á gangandi vegfaranda. „Minniháttar áverkar á höfði sem sjúkraflutningamenn sinntu á vettvangi. Ökumaður grunaður um að hafa bakkað bifreiðinni hratt og ógætilega þannig að hætta skapaðist fyrir aðra,“ segir í dagbók lögreglu.

Alls voru 85 mál bókuð á tímabilinu 17 í gær til fimm í morgun. Fjórir ökumenn voru handteknir grunaðir um akstur undir áhrifum áfengis eða fíkniefna. Allir voru látnir lausir eftir sýnatöku.