Lífið

Óvissunni um Madonnu loksins eytt

Kolbeinn Tumi Daðason í Tel Aviv skrifar
Madonna mun flytja lögin Like a Prayer og Future en kostnaðurinn við að fá hana er sagður nema einni milljón dollara.
Madonna mun flytja lögin Like a Prayer og Future en kostnaðurinn við að fá hana er sagður nema einni milljón dollara. Vísir/Getty

Eftir viðræður mánuðum saman liggur loks ljóst fyrir að Madonna kemur fram á úrslitakvöldi Eurovision á laugardaginn í Tel Aviv. The Jerusalem Post greinir frá því að Madonna hafi skrifað undir samning þess efnis í morgun.

Söngkonan mun hafa komið til Tel Aviv seint á þriðjudagskvöld og lenti upp á kant við skipuleggjendur vegna þess að æfingar áttu að fara fram í höllinni án þess að skrifað hefði verið undir. Madonna æfði í keppnishöllinni í gær og hefur nú samþykkt að koma fram samkvæmt miðlum hér ytra. Von er á tilkynningu frá EBU, Samtökum evrópskra sjónvarpsstöðva.

Madonna æfði aftur í Expo Tel Aviv höllinni í morgun. Líkt og í gær æfði Madonna fyrir luktum dyrum og vakti það athygli margra í höllinni hve mjög aðgangur var skyndilega hertur og öryggisgæsla aukinn. Töldu margir líklegt að Madonna væri að æfa sem nú hefur verið staðfest.

Ekki liggur fullkomlega fyrir hvað Madonnu og EBU hefur greint á um. Blaðamaður Jerusalem Post telur greiðslur fyrir laugardagskvöldið ekki vandamálið þar sem milljarðamæringurinn Sylvan Adams greiðir þann kostnað úr eigin vasa. Aðrir miðlar hafa gert að því skóna að deilur EBU og Madonnu snúist frekar um höfundaréttarmál eða pólitísk skilaboð í atriði hennar.

Madonna hefur verið iðinn við að birta myndir og myndbönd af sér á Instagram undanfarna tvo daga í fullum skrúða.

Reiknað er með að Madonna komi fram á laugardagskvöldið á meðan símakosningunni stendur. Reiknað er með að hún taki lögin Like a Prayer og Future. Rapparinn Quavo úr tríóinu Migos, sem vann með Madonnu að gerð Future, mun koma fram með henni. Quavo heldur einmitt tónleika í Tel Aviv í kvöld sem uppselt er á.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.