Aron Sig skoraði í jafntefli í Íslendingaslag

Start og Sandefjord skildu jöfn í uppgjöri Grafarvogspiltanna í norsku úrvalsdeildinni í fótbolta í dag þegar Aron Sigurðarson skoraði eitt mark í 2-2 jafntefli gegn Viðari Ara Jónssyni og félögum í Sandefjord.

Aron skoraði á 60.mínútu leiksins en hann og Viðar Ari byrjuðu leikinn. Aron spilaði allan leikinn en Viðari var skipt af velli á 84.mínútu. Bæði mörk Sandefjord voru sjálfsmörk og kom jöfnunarmarkið í uppbótartíma.

Guðmundur Andri Tryggvason og Kristján Flóki Finnbogason sátu allan tímann á varamannabekk Start.

Á sama tímu voru Ragnar Sigurðsson og Björn Bergmann Sigurðsson í byrjunarliði Rostov sem gerði 1-1 jafntefli við Anzhi í rússnesku úrvalsdeildinni.