Lífið

Bolludagsbolla úr smiðju listakokks

Kristjana Guðbrandsdóttir skrifar
Aðalheiður Dögg Reynisdóttir eftirréttakokkur gefur uppskrift að girnilegum bollum.
Aðalheiður Dögg Reynisdóttir eftirréttakokkur gefur uppskrift að girnilegum bollum. Fréttablaðið/Ernir

Aðalheiður Dögg Reynisdóttir eftirréttakokkur lærði í Le Cordon Bleu. Hún er aðeins 22 ára gömul og hefur haft bakstur að ástríðu frá barnsaldri.

„Ég byrjaði að baka mjög ung og þegar kom að því að ákveða hvað ég ætlaði að leggja fyrir mig þá var það einföld ákvörðun. Ég lauk námi í bakaraiðn við Hótel- og matvælaskólann og lauk á sama tíma prófi sem iðnstúdent frá Menntaskólanum í Kópavogi. Þaðan fór ég til náms í Le Cordon Bleu í London og fékk styrk úr Hvatningarsjóði iðnnema sem auðveldaði mér að láta drauminn rætast,“ segir Aðalheiður Dögg frá.

„Skólinn reyndist mér vel, ég lærði mikið og það eru margir flottir kokkar sem kenna við skólann. Iðnnám finnst mér stundum vanmetið á Íslandi. En iðn er hluti af lífi allra, ég var mjög þakklát fyrir það að hljóta þennan styrk og bendi ungu fólki á að það eru miklu fleiri leiðir í boði en það heldur,“ segir hún.

Hún tók starfsnámið á Michelin-stjörnustaðnum, Pollen Street Social. „Þetta er auðvitað allt öðruvísi en hér heima og erfitt að lýsa andanum á veitingastaðnum. Á hverjum degi gerðu allir sitt allra besta og dagarnir eru langir, sextán klukkustundir. Maður gefur ekkert eftir,“ segir Aðalheiður. „Þó að álagið hafi verið mikið þá lærði ég mikið og það var ýtt undir það,“ segir hún.

Og ástríðan fyrir bakstri er hvergi á undanhaldi. „Ég get hugsað mér að gera þetta alla ævi, það eru svo margir möguleikar. Ég byrjaði í bakstri en það er alltaf eitthvað nýtt hægt að læra,“ segir Aðalheiður Dögg sem starfar um þessar mundir á veitingastaðnum Moss við Bláa lónið. „Það er frábært að vinna þar og í þessu fallega umhverfi og það er ágætt að vera í rólegri takti hér heima,“ segir hún.

Aðalheiður gætir að öllum smáatriðum, sítrónubörkurinn og karamellan er ómissandi. Fréttablaðið/Ernir

Uppskrift fyrir um 12 bollur 

Heslihnetupraline-bolla með sítrónukremi (Lemon Curd)

150 g vatn
150 g mjólk
4g salt
5 g sykur
270 g smjör
240 g hveiti
360 g egg

Hitið vatnið, mjólkina, saltið, sykurinn og smjörið upp að suðu. Bætið við hveitinu og hrærið vel. Í pottinum myndast deigmassi sem þarf að elda þar til myndast skán á botni pönnunnar. Færið í hrærivél eða skál og hrærið til að kæla deigið örlítið. Bætið við eggjum, einu í einu og hrærið vel á milli. Haldið áfram þangað til blandan er slétt og glansandi og rennur af sleifinni þannig að það myndast eins konar fáni. Setjið blönduna í sprautupoka og sprautið á plötu. Bakið við 180 gráður í um 30 mín. Passið að opna ekki ofninn til að koma í veg fyrir að þær falli.

Sítrónukrem
120 g sítrónusafi (um 3 sítrónur)
Börkur af einni sítrónu
150 g sykur
180 g egg
40 g smjör

Setjið sykurinn safann og börk í pott og hitið að suðu. Brjótið eggin í skál og hrærið saman. Hellið heitu sykurblöndunni yfir eggin og hrærið á meðan. Setjið skálina yfir vatnsbað og hrærið þar til blandan þykknar (um 68°C). Færið af hitanum og sigtið. Takið smjörið og hrærið því vel saman við. Kælið.

Praline
200 g heslihnetur
200 g sykur
6 msk. vatn

Ristið heslihneturnar í 160°C ofni þar til þær eru gullnar. Takið hneturnar út og brjótið gróflega. Setjið sykurinn og vatnið í pott. Sjóðið karamelluna þar til vatnið er allt gufað uppog sykurinn orðinn karmelíseraður. Hellið heitri blöndunni yfir hneturnar og leyfið karamellunni að kólna alveg. Takið karamelluhneturnar og brjótið niður í minni búta. Endilega geyma nokkra sem þið getið notað til að skreyta bollurnar ykkar. Setjið í matvinnsluve´l og vinnið þar til þið hafið myndað paste eða praline.

Praline-rjómi
300 g praline
90 g rjómi
500 ml rjómi

Hitið minni hlutann af rjómanum upp að suðu. Hellið í þrem hlutum saman við praline-ið á meðan þið hrærið vel. Blanda þar til blandan er orðin slétt og glansandi, það er líka gott að nota töfrasprota til að koma blöndunni saman. Leyfið blöndunni að kólna. Þeytið stærri hlutann af rjómanum. Takið smá af þeytta rjómanum og blandið varlega saman við praline-blönduna. Bætið svo við restinni af rjómanum og blandið vel.

Karamella
125 g sykur
3 msk. vatn
125 g rjómi
1/2 tsk. vanilludropar
Klípa af sjávarsalti

Setjið sykur og vatn í pott og sjóðið þar til blandan er gullbrún. Takið af hellunni og bætið rjómanum við í pörtum. Passið ykkur á gufunni sem kemur. Bætið vanillunni og saltinu við og kælið.

Sítrónubörkur (til skrauts)
1 sítróna
100 g sykur
100 g vatn

Skerið börkinn af sítrónunni. Fjarlægið allt það hvíta af berkinum. Skerið börkinn í þunna strimla. Blansið börkinn þrisvar sinnum (börkurinn settur í vatn og hitaður upp að suðu og færður svo yfir í kalt vatn). Sjóðið sykur og vatn saman. Setjið börkinn út í og leyfið að krauma við vægan hita í 15 til 20 mín. þar til hann er orðinn gegnsær.

Samsetning
Skerið bolluna í tvennt og dýfið toppnum í karamelluna. Fyllið botninn með sítrónukremi og sprautið rjómanum á. Skreytið með hnetum og sítrónuberki.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.