Marsspá Siggu Kling - Sporðdrekinn: Vertu þakklátur því lífið þitt er upp á við

Elsku Sporðdrekinn minn, þú þarft að berjast fyrir sjálfum þér, sýna hvað þú ert tignarlegur og sterkur einstaklingur í tilverunni. Þú þarft að fá lánaða dómgreind ef þú veist ekki alveg hvað þú átt að gera af því að þér finnst þú hafir ekki kraftinn, þá talaðu við einhvern sem veit betur og fáðu lánaða dómgreind hans eða hennar.

Það sem eflir þig fyrst og fremst núna er að hafa nóg fyrir stafni og láta þig bara vaða í hlutina sama hvað það er, því það borgar sig ekki að fresta eða ýta á „snooze“.

Það er mikill kraftur yfir Sporðdrekanum og þú getur notað hann til að efla þig margfalt og þú verður sérstaklega sterkur þegar líða tekur á mánuðinn, því þú veist þetta er allt undir sjálfum þér komið. Talan 13 er sérstök happatala og það verða umbreytingar á sjálfum þér, þú ert að breytast úr lirfu í fagurt fiðrildi og það er líka svo mikilvægt þú sjáir og skynjir það sjálfur.

Þessi tíðni er sterkust um miðjan mars og hamingjan býr heima hjá þér, svo breyttu hlutunum og settu nýjan anda í heimili þitt og bjóddu nýtt og kærleiksríkt líf velkomið inn. Gerðu þetta á hverjum degi þegar þú vaknar og ferð á klósettið, skaltu þakka fyrir í hverju skrefi að nýtt líf og nýr dagur er hafinn.

Þú ert að vinna á einhverjum veikindum, hvort sem það tengist sjálfum þér eða öðrum og jákvæðar fréttir eru í farvatninu og ef þú hugsar aftur í tímann ertu búinn að breytast meira en þig grunaði, svo vertu þakklátur því lífið þitt er upp á við og þetta er þitt ár, en þú þarft að fylgja því að vera tengdur andrúmsloftinu og vera vakandi, anda inn hamingju og anda inn hamingjunni.

Í ástinni skaltu setja fjölskylduna í fyrsta sæti og gefa alla þá ást sem þú getur í þá tengingu, því þú þarft að elska af öllu hjarta, ekkert annað virkar fyrir þig.

Knús og kossar, þín Sigga Kling

Frægir Sporðdrekar: Birkir Már Sævarsson landsliðsmaður, Dísa í World Class, Helga Braga Jónsdóttir leikkona, Björk Guðmundsdóttir söngkona, Scarlett Johansson leikkona, Whoopie Goldberg leikkona, Sigríður Elva Vilhjálmsdóttir sjónvarpskona, Emmsjé Gauti rappari, Björk, Indira Ghandi, Karl bretaprins, Hillary Clinton, Leonardo DiCaprio, Magnús Scheving, Steingrímur Sævarr Ólafsson fjölmiðlaráðgjafi, Guðný Hrefna Sverrisdóttir, flugfreyja og gourmé kokkur, Hörður Ágústsson Macland snillingur, Indira Gandhi, Guðrún Ásmundsdóttir og Calvin Klein.