Kolbeinn sagður hafa verið handtekinn vegna óláta á skemmtistað

Kolbeinn Sigþórsson, leikmaður AIK og íslenska landsliðsins, var handtekinn vegna óláta á skemmtistað aðfaranótt fimmtudags. Fréttablaðið greinir frá.

Í morgun greindi Expressen frá því að leikmaður í sænsku úrvalsdeildinni hefði verið með ólæti á skemmtistað, lent í ryskingum við öryggisverði og veitt mótþróta er hann var handtekinn klukkan þrjú aðfaranótt fimmtudags.

Nafninu er haldið leyndu í umfjöllun Expressen en samkvæmt heimildum Fréttablaðsins er um að ræða Kolbein Sigþórsson.

Í frétt Expressen segist formaður AIK harma uppákomuna og hann hafi rætt við Kolbein.

„Að fara út að skemmta sér í miðbænum á þennan máta er ekki samkvæmt okkar gildum,“ segir formaður AIK í fréttinni.

Ekki liggur fyrir hvort Kolbeinn verður með AIK þegar liðið mætir Sundsvall í lokaumferð sænsku úrvalsdeildarinnar á morgun.