Rúmlega 1500 færri á hverjum leik hjá konunum í KR

Knattspyrnusamband Íslands sagði frá aðsókn í Pepsi Max deild karla fyrr í vikunni og í dag komu samskonar tölur hjá konunum en í báðum deildum er mótið nokkurn veginn hálfnað.

Það er sláandi munur á aðsókninni en næstum því þúsund færri koma á hvern leik í Pepsi Max deild kvenna en í Pepsi Max deild karla.

Alls hafa 9.009 áhorfendur sótt leikina 43 í Pepsi Max deild kvenna það sem af er sumri, eða 210 manns að meðaltali á hvern leik.  KSÍ segir frá.

Flestir áhorfendur að meðaltali mæta á heimaleiki Breiðabliks, eða 392, og næst flestir á heimaleiki Vals, eða 344.  

Best sótti leikurinn hingað til var einmitt viðureign þessara liða að Hlíðarenda, en þar voru áhorfendur 828 talsins.

Alls hafa verið leiknir 68 leikir í Pepsi Max deild karla og er heildarfjöldi áhorfenda 76.646, sem er meðalfjöldi 1.127 á leik.

Það koma því 917 fleiri á hvern leik hjá körlunum.

Þegar við skoðum aðeins liðin sem eru bæði með karla- og kvennalið í Pepsi Max í sumar þá er langmesti munurinn á aðsókn hjá KR. Það koma 1522 færri á leiki kvennaliðs KR (136) en á leiki karlaliðs KR (1658). KR fer úr því að vera með mestu aðsóknina á karlaleiki í það að vera með næstminnstu aðsóknina á kvennaleikina. 

Besta meðalaðsóknin á heimaleiki liðanna í Pepsi Max deild kvenna:

1. Breiðablik 392 áhorfendur á leik

2. Valur 344

3. Þór/KA 265

4. Stjarnan 212

5. Selfoss 191

6. Fylkir 175

7. HK/Víkingur 165

8. Keflavík 156

9. KR 136

10. ÍBV 108

Mesti munur á aðsókna á karla- og kvennaleiki:

KR    1522 fleiri á karlaleiki

Fylkir    1211 -

Breiðablik    1201 -

HK/Víkingur    903 og 685 -

Stjarnan    811 -

Valur    743 -

Þór/KA    630 -

ÍBV    319 -