Sigurður Egill Lárusson og töpuðu stigin tíu

Valur er í sjötta sæti Pepsi Max-deildarinnar eftir 3-2 tap í dramatískum stórleik gegn FH á Origo-vellinum er liðin mættust í 16. umferð deildarinnar.

Gengi Vals hefur verið upp og niður í sumar en eftir afar dapra byrjun náði liðið aðeins að rétta úr kútnum. Liðið hefur nú unnið tvo af síðustu átta leikjum í öllum keppnum.

Valsmenn hafa verið duglegir að missa niður forystu í leikjum sínum í sumar og ef kíkt er nánar á leikskýrslunni úr þessum leikjum má sjá nokkuð athyglisvert.

Í þeim leikjum sem Valur hefur misst niður forystu er kantmaðurinn Sigurður Egill Lárusson yfirleitt tekinn af velli. Í fimm leikjum hefur Sigurður verið tekinn af velli og í þeim leikjum hefur Valur tapað tíu stigum.

Í þokkabót var Sigurður Egill ekki með Vals-liðinu í fyrstu þremur leikjum liðsins í deildinni þar sem liðið fékk einungis eitt stig. Sigurður var heldur ekki með er Valur féll úr leik gegn FH í 32-liða úrslitum Mjólkurbikarsins.

Ef og hefði eru orð sem eru oft notuð í fótbolta en ef Valur hefði verið með tíu stigum meira á þessum tímapunkti í Pepsi Max-deildinni væru Íslandsmeistararnir í öðru sætinu með 33 stig.

Hér að neðan má sjá tölfræðina úr leikjunum sem Sigurður Egill hefur verið tekinn af velli.



Leikir sumarsins sem Sigurður Egill Lárisson fer útaf:



12. ágúst Valur - FH 2-3

Sigurður Egill Lárusson fór af velli á 72. mínútu í stöðunni 2-1 fyrir Val.

Niðurstaða: Þrjú töpuð stig

21. júlí Víkingur - Valur 2-2

Sigurður Egill Lárusson fór af velli á 73. mínútu í stöðunni 2-1 fyrir Val.

Niðurstaða: Tvö töpuð stig

19. júní KR - Valur 3-2

Sigurður Egill Lárusson fór af velli á 55. mínútu í stöðunni 2-0 fyrir Val.

Niðurstaða: Þrjú töpuð stig

26. maí Valur - Breiðablik 0-1

Sigurður Egill Lárusson fór af velli á 68. mínútu í stöðunni 0-0.

Niðurstaða: Eitt tapað stig

20. maí FH - Valur 3-2

Sigurður Egill Lárusson fer af velli á 73. mínútu í stöðunni 1-1.

Niðurstaða: Eitt tapað stig

Niðurstaða í heild sinni: Fimm leikir og tíu töpuð stig.