Rúnar Már: Líklega misst af lestinni að komast í enska boltann

Rúnar Már S. Sigurjónsson hefur staðið sig vel með Grasshopper í Sviss og er orðinn fyrirliði liðsins. Hann er nú mættur með landsliðinu til Frakklands með sjálfstraustið í góðu standi.

„Mér finnst alltaf æðislegt að koma til móts við landsliðið enda frábær hópur. Það er alltaf gott að kúpla sig út úr félagsliðadæminu og mann hlakkar alltaf til að hitta hópinn,“ segir Rúnar Már léttur og kátur.

„Þetta hefur verið upp og ofan hjá okkur í Sviss. Vinnum einn og töpum næsta. Það er heiður að vera fyrirliði hjá stórum klúbbi eins og Grasshopper og ég reyni að gera mitt besta í því hlutverki.“

Rúnar segir að þó svo margt mætti laga hjá Grasshopper þá sé það gott félag.

„Það er gott að vera í Sviss og þetta er stór klúbbur. Ég er að renna út á samningi í sumar og við sjáum hvað setur,“ segir Skagfirðingurinn en hvert stefnir hugurinn?

„Ég verð að vera raunsær. Maður er ekkert að yngjast og verður að skoða allt sem kemur upp. Alla stráka dreymir um að spila í enska boltanum en ég held að það sé farið frá mér en við sjáum hvað kemur upp. Það er allt í gangi og ég get samið í janúar. Ég hef ekki hugmynd um hvað gerist.“

Rúnar Már segir að það sé spennandi að fá að mæta heimsmeisturunum á heimavelli svona skömmu eftir HM.

„Alla fótboltamenn dreymir um að spila gegn þeim bestu í heiminum og alla hlakkar til. Ég vona að ég fái að taka þátt og er tilbúinn að spila ef ég verð valinn.“