Hringdi í alla ættina með byssu upp við hnakkann

Karlmaður sem hefur farið í um sextíu ferðir sem Burðardýr lýsti ferlinu ítarlega í síðasta þætti af Burðardýrum. Hann hefur aldrei verið handtekinn fyrir smygl.

Maðurinn kom ekki fram undir nafnið og er hann hér eftir kallaður Herra X. Fram kom í þættinum að Herra X hefur oft á tíðum komið sér í vandræði í tengslum við neyslu sína og smygl. Aðallega hefur hann þá orðið fyrir aðkasti og ofbeldi manna í undirheimunum erlendis. Eitt sinn var Herra X sendur út með mörg hundruð þúsund krónur sem hann eyddi um leið í neyslu og gott djamm, eins og hann orðar það sjálfur.

„Síðan kemur að deginum sem ég átti að hitta gaurana og kaupa efnið af þeim. Þegar búið er að leggja inn pöntun fyrir fíkniefnum, þá er ekkert hægt að snúa við. Ég hélt að þetta myndi bara reddast,“ segir Herra X en móttökurnar voru ekki góðar þegar hann mætti á svæðið tómhentur.

„Þeir komu bara heim til mín, í þá íbúð sem ég var með og voru með dópið. Þeir öskruðu bara á mig „where is the money“ og ég reyni bara að segja þeim að við séum hættir við að kaupa efnið,“ sagði maðurinn í þættinum. Stuttu seinna var Herra X kominn með byssu upp við hnakkann og mennirnir hótuðu að drepa hann.

Mamma skellti á

„Ég fæ byssu beint upp við hnakkann á mér og hringi bara strax í mömmu, sem ég hafði ekki talað við í þrjú ár. Henni fannst svo gott að heyra í mér og trúði bara ekki að ég væri að hringja í hana loksins. Það versta við þetta var að ég var bara að hringja í hana því ég skuldaði pening og það var bara verið að fara drepa mig. Eins erfitt að það var að tala við hana, þá segi ég bara við hana að ég skuldi pening. Ég segi við mömmu að ég sé með byssu fyrir aftan mig og það ætti að drepa mig,“ segir maðurinn sem skalf allur er hann talaði við móður sína í símann.

„Ég var næstum því grátandi en mamma svaraði mér bara: „nei, ég tek ekki þátt í svona bulli og skellti á. Ég vissi innst inni að þetta var eini sénsinn minn að komast í burtu frá þessu lifandi. Mamma hafði oft borgað skuldir fyrir mig áður. Ég ákvað að gefast ekki upp og fór í tölvu, fann alla ættingja mína á já.is. og byrjaði að hringja og hringja og biðja um peninga. Ég var nánast búinn að hringja allan ættlegg minn,“ segir Herra x sem ákvað síðan að hringja í móður eins vinar síns.

„Ég hringi í hana og hún heyrir strax á mér að það sé ekki allt í lagi hjá mér. Ég segi bara við hana að ég skuldi og það séu menn að fara drepa mig. Ég sagði henni bara sannleikann, að ég hafi klúðrað smyglferð og mig vanti pening núna, annars sé ég dauður. Hún ákvað bara að leggja inn á mig.“

Þáttaröðin Burðardýr fjallar um einstaklinga úr íslenskum veruleika sem flækst hafa inn í skuggavef alþjóðlegs eiturlyfjasmygls.

Í hverjum þætti segja einstaklingar sína sögu úr undirheimunum. Skipuleggjendur eiturlyfjasmygls nýta sér neyð fórnarlamba, nota hótanir og ofbeldi til að fá vilja sínum framgengt.

Hér að neðan má sjá brot úr þættinum frá því á sunnudagskvöldið.