Hólmar Örn: Ætlum ekki að mæta og gera okkur að fíflum

Hinn 37 ára gamli Hólmar Örn Rúnarsson spilar á morgun sinn síðasta leik fyrir Keflavík eftir glæstan feril. Hann fékk ekkert draumatímabil til að kveðja og flestir búast við því að Keflavík fái stóran skell á morgun.

Þá sækir Keflavík lið Vals heim sem er á toppi Pepsi-deildarinnar og með níu fingur á bikarnum. Keflavík hefur ekki unnið leik í allt sumar og aðeins skorað tíu mörk í 21 leik. Það er því ekkert skrítið að Valsmönnum sé spáð stórsigri og Íslandsmeistaratitlinum.

Líklega síðasti leikurinn

„Þetta verður minn síðasti leikur nema ég reimi skóna eitthvað á mig hjá Víði,“ segir Hólmar Örn en hann mun taka við þjálfun 2. deildarliðs Víðis á næstu dögum.

„Það er alltaf gaman að spila fótboltaleiki og tilfinningin er ekkert öðruvísi þannig séð þó svo þetta sé lokaleikurinn með Keflavík. Ég get samt viðurkennt að það verður gott þegar þetta tímabil er búið,“ segir Hólmar og hlær við. „Þetta er eins og það er.“

Umræðan fyrir leik Vals og Keflavíkur snýst meira og minna um hversu stóran sigur Valur muni vinna og hversu mörg mörk Patrick Pedersen skori. Hvernig er að hlusta á svona í aðdraganda leiksins?

Þarf ekkert að peppa okkur upp

„Það þarf ekkert aukalega til að peppa okkur upp og það verður örugglega gaman að spila leikinn fyrir framan fullan völl. Við erum með fullt af ungum strákum sem vilja sanna sig og við ætlum ekki að mæta og gera okkur að fíflum,“ segir Hólmar Örn og bætir við að hann sé lítið að fylgjast með umræðunni. Það er viljandi gert.

„Þegar gengur svona þá kúpla ég mig bara frá fjölmiðlunum. Ég hef ekki horft á nema 2-3 þætti af Pepsimörkunum. Ég hef því ekki orðið mikið var við neikvæða umræðu.“

Leikur Vals og Keflavíkur verður í beinni á Stöð 2 Sport 2 á morgun. Lokaumferð Pepsi-deildarinnar verður svo gerð upp í löngum þætti af Pepsimörkunum sem hefst klukkan 19.15.