Jólaspá Siggu Kling – Steingeitin: Getur átt það til að staðna í hlutverkum

Elsku Steingeitin mín, eins viljasterk og beinskeitt persóna sem þú ert þá gefurðu sjaldan eftir og það kemur sá tími að þú þurfir að sleppa tökunum því lífið er búið að vera að senda þér mjög sérkennileg skilaboð. Miklar breytingar eru í kortunum þínum og margt er þegar komið til þín. Sveigjanleiki er orðið sem ég vil senda þér því það mun hjálpa þér til þess að koma þér út úr erfiðum aðstæðum og þú munt sjá að þú stendur uppi sem sigurvegari, til hamingju með það!

Þú getur átt það til að staðna í hlutverkum sem þér í raun og veru leiðast, þá kemstu hvorki afturábak né áfram og með því kemur tilhneiging til þess að draga sig í hlé og forðast fólk, en núna skaltu nýta þér afstöðu tunglanna og stökkva þó þú sjáir ekki hvort þú sért að hoppa í djúpu eða grunnu laugina, erfiðleikar breytast í gleði og gleðin breytist í hamingju. Ef sálin er að naga þig er það þér að kenna, þetta kallast vorkunn og það er meðal verstu hugsana sem læðast að manni.

Það er ekkert að sem þú getur ekki sigrað og þú ert á svo magnþrungnum tímapunkti sem leyfir þér að elska og njóta lífsins til fullnustu. Næstu áttatíu dagar verða eins og jóladagatal, þú veist ekki hvaða moli eða hvaða skilaboð munu koma til þín þegar þú opnar daginn.

Þú átt miklu fleiri vini en þú heldur og það eru mun fleiri sem líta upp til þín en þú getur ímyndað þér, farðu rólega í eyðslubrjálæðinu sem er að sigla inn og gefðu frekar tíma þinn, skrifaðu niður fallegar og persónulegar setningar og færðu fólki það, því það er eitthvað sem við manneskjurnar munum helst eftir. Vasarnir brotna og dótið týnist, en orðin hafa svo mikinn mátt og lifa áfram í frumunum okkar.

Frægar Steingeitur: Guðjón Pétur Lýðsson markakóngur, Svava Johansen í Sautján, Ingibjörg Sólrún Gísladóttir, dr. Kristín Ólafsdóttir og Davíð Oddsson, Jón Gnarr, Elvis Presley, Gunnar Þórðarson, Tómas Guðbjartsson læknahetja, Lovísa Tómas, Dorrit Moussaieff forsetafrú, Þuríður Blær Jóhannsdóttir, leikkona og Reykjavíkurdóttir, Jesús og Simmi á Fabrikkunni, Óttar Proppé, Ingveldur Ægissdóttir módir og kvunndagshetja, Hendrika Waage hönnuður, Laddi, Jóhann K. Jóhannsson fréttamaður.