Óvíst hvort Sigmundur og Gunnar Bragi mæti á nefndarfund um sendiherrakapal

Á morgun klukkan níu árdegis heldur stjórnskipunar- og eftirlitsnefnd Alþingis opinn fund þar sem til stendur að fá fram vitnisburð þeirra Bjarna Benediktssonar formanns Sjálfstæðisflokksins, Guðlaugs Þórs Þórðarsonar utanríkisráðherra, Sigmundar Davíðs Gunnlaugssonar formanns Miðflokks og Gunnars Braga Sveinssonar fyrrverandi utanríkisráðherra um svonefndan sendiherrakapal.

Samkvæmt heimildum Vísis hafa hvorki Sigmundur Davíð né Gunnar Bragi svarað fundarboðinu.

Nefndinni bera að hafa eftirlit með ráðherrum

Tilefnið er fundur þeirra og umræða um mögulega skipan Gunnars Braga í embætti sendiherra en í hinum frægu Klausturupptökum heyrist hann lýsa því að Bjarni og Guðlaugur Þór þurfi að ganga frá skipan hans í sendiherraembætti. Hann eigi inni greiða hjá Sjálfstæðisflokknum eftir að hann skipaði Geir H. Haarde sendiherra á Washington.

Jón Þór Ólafsson þingmaður Pírata hefur sagt, í samtali við Vísi, að nefndin hafi eftirlitsskyldu gagnvart framkvæmdavaldinu.  „Þetta er bara skylda stjórnskipunar og eftirlitsnefndar. Lögbundin skylda að sinna eftirliti með ráðherrum. Játning á atriði sem maður getur ekki annað séð en að væri brot á lögum að skipa einhvern í skiptum fyrir greiða og ráðherra á að starfa í almannaþágu og ekki láta sína hagsmuni ráða störfum sínum.“

 

Sagt satt eða logið um meinta lygi

Gunnar Bragi er sem stendur í leyfi frá þingstörfum í kjölfar þess að Klausturupptökurnar voru gerðar opinberar. Gunnar Bragi tjáði sig strax eftir að þær komu fram en hefur hins vegar ekkert tjáð sig neitt eftir það þó ýmislegt megi heita útistandandi í málinu. Gunnar Bragi sagðist hafa verið að ljúga uppá Bjarna á Klaustur bar og Bjarni hefur lýst því yfir að Gunnar Bragi eigi ekkert inni hjá flokknum. Hins vegar hefur hann viðurkennt að slíkur fundur hafi farið fram og Guðlaugur Þór einnig, þar sem það var rætt.

Bjarni Harðarson fyrrverandi þingmaður Framsóknarflokksins, einn af fáum sem sagt hefur af sér þingmennsku þá vegna þess að hann sendi póst á rangan stað með óviðurkvæmilegum ummælum, hefur sagt á Facebooksíðu sinni að á téðu fundi muni gefast einstakt tækifæri á að „hlusta á þingmenn segja ósatt þegar rætt verður um sendiherrastöðuna sem átti upphaflega að tilheyra Steingrími J. en endaði hjá Árna Þór. Miklu betra en nokkur glæpaþáttur og ef það verður bein myndútsending má sjá nef lengjast!“

Steingrími J ætluð staðan

Eyjan ræddi við Bjarna vegna þessa í gær og þar telur hann einsýnt að Gunnar Bragi hafi verið að fara rétt með á barnum þó hann hafi dregið í land síðar. Þá fullyrðir Bjarni að Steingrímur J. Sigfússon, nú forseti Alþingis, hafi átt að fá sendiherrastöðuna sem endaði hjá Árna Þór. Það hafi verið samantekin ráð hjá Gunnari Braga og Sigmundi Davíð að sniðganga Steingrím.

„Upphaflega átti Steingrímur J. Sigfússon að fá þessa stöðu, en þá var persónulegur fjandskapur milli hans og Framsóknarflokksins svo mikill að það gekk ekki í gegn. Það getur nú vel verið að Gunnar Bragi súpi nú eitthvað seyðið af því núna. Nú sér hvert mannsbarn að Gunnar Bragi fær ekki svo mikið sem bílstjórastöðu innan stjórnarráðsins. En það hjálpar þeim (Gunnari Braga og Sigmundi) eflaust ekki núna að hafa staðið gegn því að Steingrímur fengi nokkuð og það getur líka haft sínar afleiðingar,“ sagði Bjarni meðal annars í samtali við Eyjuna.

Þó stjórnarandstaðan sé í hinu mesta klandri vegna Klausturupptaknanna og svo máli sem snýr að Ágústi Ólafi Ágústssyni, þingmanni Samfylkingarinnar, er víst að málið getur reynst stjórnarflokkunum erfitt. En það snýr að samtryggingarspillingu sem mörgum sýnist blasa við.