Októberspá Siggu Kling – Steingeitin: Komdu þér á óvart með því að efla karakterinn

Elsku Steingeitin mín, lífið er að fara að gefa þér verðlaun því þú átt það skilið, það er búið að vera svo mikið að gerast á þessu ári sem svo sannarlega hefur gert þig sterkari og sterkari og það var tilgangurinn. Það er eins og þú sjáir að sólin sé að fara að skína á þig, alvöru Steingeitarsumar. Þú ert búin að tengja þig svo vel í gegnum tíðina og gróðursetja sterk bönd við fólk í kringum þig sem mun svo sannarlega sjá hvað þú getur.

Þú ert að fara inn í besta tímabilið á þessu ári og það mun ekki bara fylgja þér næsta mánuð heldur fram í mars á næsta ári. Nýttu þér að hafa þessa orku í kringum þig, komdu þér á óvart með því að efla karakterinn þinn og þú þarft að skoða hvernig týpa vil ég vera? Og í þessari skoðun er svo mikilvægt að þér líki vel við sjálfan þig og getir svo sannnarlega sagt ég er búin að gera mitt besta og í raun aðeins meira en það.

Það er í eðli þínu að segja engum hvað er að gerast í lífi þínu, setja bara á þig grímu. Maður þarf að hafa þekkt þig ótrúlega lengi til að skilja og átta sig á að þó þú sért sterkur karakter ertu jafn viðkvæmur og þú ert sterkur. Þegar þú áttar þig á þessum þáttum í persónu þinni skilurðu sjálfan þig betur.

Ég hef oft hugsað hver er ég og það er oft þannig að maður þekkir vini sína betur en sjálfan sig og getur gefið þeim svo góð ráð, svo spurðu vini þína ráða, þeirra dómgreind gefur þér skýrari mynd. Þú skalt ljúka því sem þú byrjar á og alls ekki byrja á einhverju sem þú nennir ekki því það er eina togstreitan sem gæti pirrað þig, tekið kraft frá þeim verkefnum sem gefa þér gleði, svo gerðu allt með gleði því þá verður allt að gulli sem þú snertir.

Frægar Steingeitur: Guðjón Pétur Lýðsson markakóngur, Svava Johansen í Sautján, Ingibjörg Sólrún Gísladóttir, dr. Kristín Ólafsdóttir og Davíð Oddsson, Jón Gnarr, Elvis Presley, Gunnar Þórðarson, Tómas Guðbjartsson læknahetja, Lovísa Tómas, Dorrit Moussaieff forsetafrú, Þuríður Blær Jóhannsdóttir, leikkona og Reykjavíkurdóttir, Jesús og Simmi á Fabrikkunni, Óttar Proppé, Ingveldur Ægissdóttir módir og kvunndagshetja, Hendrika Waage hönnuður, Laddi, Jóhann K. Jóhannsson fréttamaður.