Októberspá Siggu Kling - Tvíburinn: Átt eftir að sjá svo margt í öðru samhengi

Elsku Tvíburinn minn, það verða svo sérstaklega góð samskipti þín við aðra sem gefur þér svo mikið og þú átt svo auðvelt með tjáningu sem gerir það að verkum að allt verður auðveldara og allur ótti hverfur og ef þú skoðar það er allur ótti þinn út af öðru fólki en ekki persónulega frá sjálfum þér.

Þú átt eftir að sjá svo margt í öðru samhengi og byggja þér svo gott hreiður og sterkt heimili. Það er svo mikilvægt þú hafir mikið ljós í kringum þig, svo kveiktu á fleiri ljósum, hafðu sterkari perur, kerti eða hvað svo sem tengist ljósadýrð.

Ef þú ert ekki nýbúin að skreppa til útlanda eða í stutt ferðalag er það á döfinni, því þú elskar ferðalög og breytingar. Þegar þú þarft einbeitingu og ró skaltu fara í smá ferðalag í bílnum þínum, þá ertu einn með sálinni og færð þínar bestu hugmyndir. Hugmynd er að sjálfsögðu mynd sem birtist í huganum og fer út í universið eða alheiminn og þá byrjar eitthvað nýtt að myndast.

Það skrifaði mér Tvíburi bréf eftir síðustu spá og kvartaði yfir innihaldinu en samt hlakkaði hana alltaf til að lesa hana, svo hafði annar Tvíburi samband við mig sem þakkaði mér svo mikið fyrir síðustu spárnar. Það er nefnilega þannig að þegar við erum leið tökum við bara eftir því leiðinlega en þegar við erum jákvæð sjáum við það besta í kringum okkur.

Ef þú ert á lausu hjartað mitt er svo mikilvægt þér líði vel þegar þú ákveður hver það er sem er þess virði að vera með í ástinni, svo elsku Tvíburinn minn taktu það út úr spánni sem gleður þig, en hentu hinu.

Það á eftir að heppnast nær allt sem þú tekur þér fyrir hendur því þú ert rithöfundurinn að þínu handriti og það er engum öðrum að þakka eða að kenna hversu langt þú hefur náð, því það hefur verið að þínum verðleikum.

Frægir Tvíburar: Ragnar Sigurðsson landsliðsmaður, Örn Árnason leikari, Óli Geir Jónsson plötusnúður, Bjarni töframaður, Hrund Þórsdóttir fréttakona, Össur Skarphéðinsson húmoristi, Johnny Depp leikari, Páll Magnússon fjölmiðlamaður, Kjartan Atli Kjartansson lífsspekúlant, Heimir Hallgrímsson landsliðsþjálfari, Gunnar Einarsson, bæjarstjóri Garðabæjar, Andri Freyr útvarpsmaður og Lýðveldið Ísland, Donald Trump, Þórarinn Þórarinsson blaðamaður, Bjartmar Guðlaugsson, söngvari og snillingur, Jóhanna Heiðdal lögfræðingur.