„Þær eru allar svo miklir meistarar“

Hjördís Hugrún Sigurðardóttir formaður Stuðverks - skemmtifélags verkfræðikvenna og verkefnastjóri hjá ABB í Zürich skrifaði bókina Tækifærin ásamt móður sinni Ólöfu Rún Skúladóttur fjölmiðlakonu og leiðsögumanni en bókin kom út árið 2014. Í bókinni eru viðtöl við 50 íslenskar konur; frumkvöðla, forstjóra, vísindamenn, sérfræðinga og ævintýrakonur almennt.

Konurnar starfa víða um heim, og allar hafa þær lokið námi á sviði verkfræði, tækni eða raunvísinda. Athyglisverðar frásagnir og góð ráð fléttast saman við sögur af náms- og starfsferli kvennanna fimmtíu.

„Þær eru allar svo miklir meistarar og mér finnst dýrmætt að vita af þeim öllum og þekkja þeirra sögur. Þetta er í raun stemmnings bók með áhugaverðum ráðum og sögum. Að velja hvað maður vill læra og svo starfa við getur verið snúið. Þær þora að vera einlægar og það er mjög hvetjandi að lesa viðtölin. Þegar litið er til einstaklinga sem náð hafa langt virðist oft sem allt hafi alltaf gengið upp hjá viðkomandi, en yfirleitt er miklu meira á bak við það. Við viljum að allir hafi færi á að lesa viðtölin og ákváðum því að birta þau eitt af öðru á heimasíðunni tækifærin.is,“ segir Hjördís Hugrún en nú ætla þær mæðgur að gefa út allar þessar sögur. 

Á Instagram síðunni Tækifærin verður þar að auki hægt að fylgjast með.

„Við hvetjum líka bæði stráka og stelpur til að deila mynd á samfélagsmiðlum af einhverri sem þeim þykir vera meistari, undir myllumerkinu #húnermeistari og hvetjum einnig sérstaklega allar stelpur til að deila ráðum, sem þú myndir gefa yngri þér, undir myllumerkinu #jáhúnáséns,“ bætir Hjördís Hugrún við.

Á næstunni verða viðtölin úr bókinni Tækifærin gerð aðgengileg á heimasíðunni tækifærin.is.