Samúel í sigurliði en erfitt hjá öðrum Íslendingaliðum

HM-farinn, Samúel Kári Friðjónsson, spilaði í rúman klukkutíma er Vålerenga vann 1-0 sigur á Stabæk í norsku úrvalsdeildinni í knattspyrnu í dag.

Samúel spilaði í 62 mínútur en eina mark leiksins skoraði Sam Johnson á fjórtándu mínútu. Vålerenga er í fimmta sætinu með átján stig.

Kristján Flóki Finnbogason og Aron Sigurðarson spiluðu báðir allan leikinn er Start steinlá fyrir Sarpsborg, 4-0, á útivelli í sömu deild.

Start hefur gengið brösulega á leiktíðinni og er með fjögur stig eftir tíu leiki en liðið situr á botni deildarinnar. Liðið er með einu stigi minna en annað Íslendingalið, Sandefjord, sem tapaði einnig í dag.

Emil Pálsson spilaði allan leikinn fyrir Sandefjord sem tapaði 5-0 fyrir Odd á útivelli. Sandefjord í næst neðsta sætinu en Ingvar Jónsson var ónotaður varamaður. Emil nældi sér í gult spjald í leiknum.