Segir mikilvægt að fagna nýrri persónuverndarlöggjöf

Seinna í þessum mánuði verða innleidd ný persónuverndarlög hér á landi og starfar fjöldi fólks við undirbúning þeirra. Forstjóri Persónuverndar segir mikilvægt að fagna þessum breytingum.  

„Það eru í gildi á Íslandi í dag persónuverndarlög og þau byggja á evrópskri tilskipun frá árinu 1995 þannig að í landinu eru lög. Þeir eru allavega betur settir sem hafa farið eftir þeim lögum undanfarin ár heldur en aðrir,“  sagði Helga Þórisdóttir forstjóri Persónuverndar í viðtali í Reykjavík síðdegis á Bylgjunni.

„Þessi lög um persónuvernd hafa verið í gildi í 18 ár en tækniframfarirnar og það hvernig hægt er að vinna persónuupplýsingar, það hefur bara orðið slík breyting á því að Evrópusambandið er að koma þarna með eina umfangsmestu löggjöf sem að hefur komið yfir höfuð frá þeim í mörg ár og mestu breytingunni á persónuverndarlöggjöfinni í tuttugu ár.“

Þó svo að margar grundvallarreglurnar séu í gildi í dag er einnig verið að innleiða margar nýjar reglur.

„Það er greinilega búið að ákveða það að veita þessum réttindum aukið vægi. Útgangspunkturinn er það að auka réttarvernd borgaranna hvað varðar vinnslu persónuupplýsinga. Við fáum öll að vita hverjir eru að vinna persónuupplýsingar um okkur og hvenær og í hvaða tilgangi.“

Helga segir að löggjöfin muni ná bæði yfir einkageirann og opinbera geirann.

„Það þarf hver og einn vinnustaður að setjast niður og átta sig á því, hvaða persónuupplýsingar eru unnar hjá mér? Þá er ég að tala um þann sem ábyrgðina ber á hverjum stað.“

Hún bendir á að ef fólk deilir persónuupplýsingum með einhverju erlendu snjallsímaforriti, gæti fyrirtækið á bakvið forritið verið í samstarfi við 200 önnur fyrirtæki og deilt með þeim persónuupplýsingum um notendur. Til þess að komast að því hvernig persónuupplýsingar eru notaðar þurfa notendurnir að krefjast þeirra upplýsinga hjá fyrirtækinu sjálfu, sem verður þá að gefa upp þær upplýsingar.

„Það er gríðarlega mikið undir og það eru margar breytingar sem við erum að horfa á á þessu sviði.“

Helga játar því að reglurnar séu íþyngjandi fyrir fyrirtæki, hið opinbera og sveitarfélög.

„En þá er líka ágætt að hafa markmiðið hugfast og það er það að auka réttarvernd okkar borgara á öllum sviðum.“

Að hennar mati er númer eitt, tvö og þrjú að fagna þessum breytingum.

„Þið sjáið hvað er að gerast og kristallast í dæmunum sem við sjáum í kringum okkur, hvort sem það er Facebook eða Cambridge Analitica. Þetta er ekkert svo mikið langt í burtu dæmi. Þetta er bara ákveðinn toppur á ákveðnum ísjaka. Það er alveg margvísleg önnur vinnsla undir sem að snertir fólk án þess að það haldi að það snerti sig. Við þurfum hvert og eitt aðeins meiri aðstoð við að reyna að fást við þetta. Það er það sem þessi nýja evrópulöggjöf er að hjálpa okkur með.“

Hlusta má á viðtalið við Helgu í heild sinni hér að neðan.