23 ár og 10 mánuðir síðan Ísland vann Suður-Ameríkuþjóð

Íslenska landsliðið mætir Perú í vináttulandsleik í New Jersey í Bandaríkjunum annað kvöld og þar geta strákarnir okkar landað sjaldséðum sigri.

Íslenska karlalandsliðið hefur aðeins unnið einn af sjö leikjum sínum við þjóðir frá Suður-Ameríku og það eru 23 ár og 10 mánuði síðan þessi eini sigurleikur vannst.  

Sá sigur vannst 1-0 á Bólivíu á Laugardalsvellinum 19. maí 1994 þökk sé sigurmarki frá Þorvaldi Örlygssyni sem kom eftir undirbúning þeirra Sigurðar Jónssonar og Rúnars Kristinssonar.

Bólivía var þarna á leiðinni á HM í Bandaríkjunum, aðeins mánuði síðar, þar sem liðið spilaði opnunarleik keppninnar á móti Þýskalandi. Jürgen Klinsmann tryggði þar Þjóðverjum 1-0 sigur. Bólivía gerði svo jafntefli við Suður-Kóreu en tapaði fyrir Spáni og var úr leik eftir riðlakeppnina.

Íslenska landsliðið hefur einnig leikið við Chile (3 leikir), Brasilíu (2 leikir) og Úrúgvæ (1 leikur) og uppskeran úr þessum sex leikjum er enginn sigur, eitt jafntefli og fimm tapleikir. Markatalan er mjög óhagstæð eða -12 (3-15).

Eina jafnteflið kom á móti Chile 22. apríl 1995 en síðan þá hefur íslenska liðið tapað öllum fjórum leikjum sínum á móti Suðurameríkuþjóðum.

Bólivía var þarna með á HM í fyrsta sinn í 44 ár og hefur síðan ekki komist aftur á HM eftir þessa keppni sumarið 1994.

Landslið Perú, mótherjar Íslands í nótt, er nú komið í úrslitakeppni HM í fyrsta sinn frá HM á Spáni 1982 og þurfti því að bíða í 36 ár.

Nú er að sjá hvort strákarnir okkar nái að enda þessa löngu bið í New Jersey á morgun en ef það tekst ekki fá þeir annan möguleika í fyrsta leik HM í Rússlandi sem verður eins og flestir vita á móti liði Argentínu.