Argentínumaður meiddist eftir samstuð við Björn Bergmann og missir af HM

Argentínski miðvörðurinn Emanuel Mammana meiddist í leik með Zenit um helgina og það er ljóst að hann missir af HM í Rússlandi í sumar.

Það fylgir líka sögunni að Emanuel Mammana meiddist á hné eftir að hafa lent illa í kjölfarið á samstuði við íslenska landsliðsmanninn Björn Bergmann Sigurðarson.

#Zenit Emanuel #Mammana sufrió una grave lesión en la rodilla izquierda y se pierde el #MundialRusia2018https://t.co/HkhjcUoBlW vía @JornadaWebpic.twitter.com/RM1JijxfhG

— DiarioJornadaChubut (@JornadaWeb) March 12, 2018

Zenit var þarna að spila við Björn Bergmann og félaga í Rostov og Mammana meiddist strax á fimmtu mínútu leiksins.

Mammana fór burt af leikvanginum á hækjum en seinna kom í ljós að hann sleit krossband og reif líka liðþófa.

Mammana var á bekknum hjá argentínska landsliðinu í 4-2 tapi fyrir Nígeríu í vináttulandsleik á dögunum en var ekki valinn í hópinn fyrir leiki á móti Spáni og Ítalíu seinna í þessum mánuði.