Gróðrarstöð vill ekki skuggavarp og kærir Hveragerðisbæ

Eigendur gróðrar- og garðplöntusölunnar Borgar hafa kært Hveragerðisbæ vegna nýs deiliskipulags sem gerir ráð fyrir fjölbýlishúsum á Edenreitnum svokallaða.

Í kæru til úrskurðarnefndar umhverfis- og auðlindamála er vitnað til umsagnar um áhrif skuggavarps sem eigendur Borgar fengu frá Ráðgjafarmiðstöð landbúnaðarins. „Matsgerðin tók það skýrt fram að fyrirhugaðar byggingar myndu hafa veruleg áhrif á vaxtarskilyrði plantna og þar með draga úr nýtingu núverandi svæðis með tilliti til framleiðslu á garðplöntum og rýra því bæði framleiðslumöguleika stöðvarinnar eins og nýtingu er nú háttað og verðgildi stöðvarinnar í heild.“

Er breytingin á skipulagi Edenlóðarinnar var enn ófrágengin féllst bærinn á að fyrirhugað hús yrði lækkað úr þremur hæðum í tvær. Eigendur Borgar segja það litlu breyta. Þrjú tveggja hæða fjöleignarhús alveg við lóðarmörkin muni valda verulegum skugga á lóð þeirra.

Hveragerðisbær segir hins vegar að skuggavarp yfir lóð Borgar sé frekar lítið nema í mars klukkan fimm eftir hádegi. Eigendurnir segja ekkert að finna í skýringaruppdráttum sem styðji þetta. „Þessi fullyrðing virðist því vera sett fram algjörlega út í bláinn,“ segir í kærunni. Bærinn hafi á engan hátt rannsakað áhrif nýju húsanna á umhverfið.