Sumarspá Siggu Kling – Tvíburinn: Mátt alveg láta rigna upp í nefið á þér

Elsku hjartans kraftmikli og skemmtilegi Tvíburinn minn, orka þín er eins og glóandi eldur og sál en undir niðri efastu um hversu dásamlegur kraftur þú ert, en það er enginn sem fattar eða skynjar hversu viðkvæm sál þú ert. Og það er dásamlegt, þú mátt alveg láta rigna upp í nefið á þér og leika þér meira að lífinu en þú gerir, kæruleysi í morgunmat væri ágætis réttur. Ef þú ert á lausu þá er ágætt þú sért skotinn í fleirum en einum eða einni, því þú veist ekki alveg hvað þú vilt.

Akkúrat núna ertu á svo merkilegum tímamótum en það er algengt að þú lítir yfir síðustu ár og hugsi Er ég hamingjusamur?  Ef þú ert að efast svona mikið mundu þá að þú ert ekki gæs en hún velur sér maka til lífstíðar.

Ekki vorkenna fólki í kringum þig, það er vond orka og þú myndir aldrei vilja að neinn vorkenndi þér. Athafnasemi er lykilorð fyrir sumarið hjá þér og mundu að telja þér trú um það, já þú þarft sjálfur að telja þér trú, teldu þér trú um að: Já ég er dugleg eða duglegur, því þá er það orðið staðreynd.

Þetta er mjög skemmtilegt sumar fyrir þig,  þegar þú lest þessa spá er sumarið komið og þú munt finna út hvort sem er rigning eða sól að þú getur grillað og músík er undirstaða fyrir því að þú getir glaðst.

Einn sérstakur Tvíburi sem ég þekki mixaði til dásamlegan drykk úr Koníaki og Baileys sem hún kallar „Bailiac“ og þetta sumar verður svoleiðis einstakt mix hjá þér af draumum og ævintýrum, sem er náttúrlega mixtúran af hamingju.

Setningin þín er: Þú gerir lífið hamingjusamt

Ást og kossar, þín Sigga Kling

Frægir Tvíburar: Ragnar Sigurðsson landsliðsmaður, Örn Árnason leikari, Óli Geir Jónsson plötusnúður, Bjarni töframaður, Hrund Þórsdóttir fréttakona, Össur Skarphéðinsson húmoristi, Johnny Depp leikari, Páll Magnússon fjölmiðlamaður, Kjartan Atli Kjartansson lífsspekúlant, Heimir Hallgrímsson landsliðsþjálfari, Gunnar Einarsson, bæjarstjóri Garðabæjar, Andri Freyr útvarpsmaður og Lýðveldið Ísland, Donald Trump, Þórarinn Þórarinsson blaðamaður, Bjartmar Guðlaugsson, söngvari og snillingur, Jóhanna Heiðdal lögfræðingur.