Sumarspá Siggu Kling – Ljónið: Þetta reddast

Elsku Ljónið mitt,  það er algjör staðreynd að alveg sama hvernig þú horfir á lífið, þú munt alltaf sigra á endanum. Ég hef verið að skemmta fyrir stórt fyrirtæki í Garðabæ og af 300 manns voru þrjú Ljón sem hreyfðu sig ekki þó miklir vinningar væru í boði fyrir þau að gera eitthvað, vera hress, leika eða gera hvað sem er, sátu þau alveg kyrr, en á endanum fengu þau að sjálfsögðu vinning, voru bara svo cool, létu ekki segja sér fyrir verkum en enduðu samt sem sigurvegarar!

Þú þarft að hafa þessa setningu sterkt yfir huganum þetta sumar „þetta reddast“ sem verður líka nýja heitið á bókinni sem ég er að skrifa.

Þú ert köttur og þegar þér finnst að öll ljós séu slökkt og þú veist ekki hvert þú átt að stökkva lendirðu samt alltaf á fótunum eða lopunum því þú ert KÖTTUR og hefur níu líf hjá öllum sem hafa einhvern tímann elskað þig eða elska þig núna.

Í ástamálum gengur allt miklu betur en þú þorðir að vona, þó þú ættir stundum að skammast þín og vera auðmjúkur eða auðmjúk kemstu samt upp með að vera lævíst og lipurt Ljón. Það er svo mikilvægt þú notir alla þá dáleiðslu og daðurtækni sem þú hefur svo sterkt með þér og hafir vit á því að smjaðra fyrir þeim sem þú þarft að heilla. Smjaður er kannski leiðinlegt orð, en það er í raun og veru hrós og þó þú viljir það kannski ekki, lætur það þér líða miklu betur ef þú hrósar þeim sem þú vilt öðlast virðingu eða aðdáun frá.

Þetta er athyglisverður tími sem gefur þér líka extra athygli frá ólíkum hópum fólks svo taktu meira þátt í lífinu og láttu þig ekki komast upp með það að vera bara heima og hanga í engu, því af engu verður ekkert.

Þú ert svo miklu mikilvægari en þú sjálfur heldur og hvert unnið verk, hvort sem er smátt eða stórt er persónulegur ávinningur sem eflir stolt þitt og þú getur verið montinn af sjálfum þér. Mamma mín heitin var Ljón og dóttir mín er það líka, og mamma sagði alltaf við nöfnu sína Sigrúnu, temdu í þér Ljónið þá færðu það sem þú vilt, og það er setningin til þín elskan mín.

Knús og faðmlag, þín Sigga Kling

Fræg Ljón: Cara Delevingne fyrirsæta, Ágústa Eva Erlendsdóttir, leik- og söngkona, Halldóra Geirharðsdóttir leikkona, Birgitta Haukdal söngkona, Barack Obama Bandaríkjaforseti, Ásdís Rán fyrirsæta, Gísli Gíslason geimfari, Geir Ólafsson söngvari, Þórunn Antonía alheimsstjarna, Albert Eiríks, matgæðingur af bestu sort, Jón Óttar Ragnarsson, athafna- og fjölmiðlamaður, Jennifer Lopez söngkona, Diddú, Sirrý Arnardóttir fjölmiðlakona, Arnór Dan, söngvari, Agent Fresco, Ana Mafalda, besta húshjálp í heimi, Sema Erla Serdar, baráttukona, Rósa Ingólfsdóttir, sjónvarpskona, Anton Máni Svansson, kvikmyndaframleiðandi, Hulk.