Kóreskur sambræðingur á Prikinu

Veitinga- og öldurhúsið Prikið er komið í samstarf við veitingastaðinn Kore sem hefur verið afar farsæll í Granda Mathöll – meðal annars hefur djúpsteikti kjúklingurinn sem þar er boðið upp á ítrekað selst upp og þurfa menn að hafa hraðar hendur til að ná sér í bita.

Saman munu Kore og Prikið bjóða upp á eins konar sambræðing af matseðlum beggja staða, en Prikið er hvað þekktast fyrir hamborgara og morgunmat sem er hægt að panta alla daginn.

„Finni á Prikinu er eins og allir vita alltaf í stuði og til í að prófa nýja hluti. Hann langaði til að hrista aðeins upp í eldhúsinu og kynna nýjar bragðtegundir á gamla góða seðlinum. Kore er svona götumatar Los Angeles-snúningur á kóreska matargerð og okkur fannst það smellpassa við Prik-konseptið – tökum einfalda pælingu sem er vitað að virkar og gerum hana vel. Það verður tekinn Prik-snúningur á þetta,“ segir Geoffrey Þór Huntington-Williams, sem má segja að sé potturinn og pannan á Prikinu.

Atli Snær er maðurinn á bak við Kore. Hann útskrifaðist, fyrstur matreiðslunema, frá Michelin-staðnum Dill í maí síðastliðnum og hefur líka unnið á hinum gífurlega vinsæla Agern, stað Gunnars Karls Gíslasonar í New York.

Boðið verður upp á hamborgara með kóresku ívafi og morgunmaturinn verður að sjálfsögðu á sínum stað fyrir þá árrisulu og mögulega þá sem þjást af timburmönnum aðeins síðar um daginn.

Í kvöld verður „soft launch“ á samstarfinu og af því tilefni er smá fagnaður á Prikinu – boðið verður upp á snakk og drykk og þessi mixtúra boðin lýðnum í fyrsta sinn. Logi Pedro og rapparinn Birnir ætla að flytja nokkur góð lög og plötusnúðurinn DJ Nazareth snýr plötum. Leikar hefjast klukkan 19 og standa til 21. Samstarfið hefst svo formlega klukkan 9 á morgun, föstudagsmorgun.