NASA rennir hýru auga til Íslands

Bandaríska geimferðarstofnunin NASA hefur áhuga á að koma á samstarfi við Íslendinga vegna rannsókna á tunglinu og Mars. Rektor Háskólans í Reykjavík, sem sjálfur starfaði fyrir NASA í áratug, segir að framtíð samstarfsins sé björt.

Vísindamenn frá NASA eru á Íslandi um þessar mundir til að kanna aðstæður til rannsókna og prófana á tækni og tækjum fyrir ferðir til Mars og annarra geimferða. Fyrirlestur þeirra í Háskólanum í Reykjavík í dag vakti nokkra athygli og Ari Kristinn Jónsson, rektor skólans hitti þar gamla kollega.

„Hópurinn sem er í heimsókn á Íslandi í dag, og var að tala í Háskólanum í Reykjavík í morgun, er að vinna að verkefnum sem tengjast könnun sólkerfisins,“ segir Ari.

„Þá sérstaklega Mars og tunglsins. Stóra spurningin á bakvið vinnu þeirra er hvernig Mars hefur þróast og þá sérstaklega hvort líf geti hafa verið þar eða sé jafnvel enn í dag. Ástæðan fyrir að þau koma til Íslands er að það eru hlutir í landslagi og jarðfræði Íslands sem svipar til aðstæðna á tunglinu og Mars.

NASA hefur komið nokkrum sinnum til Íslands. Það er kannski best þekkt þegar Apollo geimfararnir komu hingað á sjöunda áratugnum og voru þá í þjálfun fyrir veru sína á tunglinu. Þá var áherslan á að vera í svipuðu landslagi og á tunglinu, það fannst við Öskju.

NASA hefur komið nokkrum síðan, nokkrum sinnum á síðustu árum. Bæði í tengslum við könnun sólkerfisins en ekki síður í tengslum við rannsóknir þeirra á jörðinni.

Ég held að framtíð þessa samstarfs sé mjög björt. Það er einlægur vilji þeirra að koma á samstarfi á Íslandi og vinna meira á Íslandi á næstu árum. Við erum boðin og búin og vinnum að því með þeim, í Háskólanum í Reykjavík og fleiri stöðum, að láta það verða að veruleika.

Þessi hópur frá NASA er sömuleiðis að vinna að því sín megin að gera þetta kleift til næstu ára. Ferðin núna er bæði til að afla upplýsinga og leggja grunninn að þessu samstarfi til næstu ára sem er mjög spennandi."