Valur varði Íslandsmeistaratitil sinn eftir 4-1 sigur á Keflavík í lokaleik Pepsideildar karla í fótbolta á Hlíðarenda í dag. Ólafur Jóhannesson fagnaði sigri eftir erfitt ár.
„Þetta er frábært, geggjað,“ sagði Ólafur Jóhannesson, þjálfari Vals, eftir leikinn.
Fyrir tímabilið bjuggust flestir við að Valsmenn myndu verja titilinn örugglega en þeir þurftu að hafa fyrir því og voru úrslitin ekki formlega ráðin fyrr en í lokaumferðinni.
„Þetta ár var mun erfiðara en það síðasta. En þetta var bara sanngjarnt held ég, mér fannst við vera svona heilt yfir bestir í þessu.“
Valur er Íslandsmeistari annað árið í röð og því fáir sem geta mótmælt því að Valsmenn séu besta liðið.
„Jájá, við erum meistarar, þá hljótum við að vera bestir,“ sagði Ólafur Jóhannesson.
Óli Jó: Erum meistarar svo við hljótum að vera bestir
Tengdar fréttir
Umfjöllun: Valur - Keflavík 4-1 | Valur Íslandsmeistari annað árið í röð
Valur er Íslandsmeistari eftir öruggan 4-1 sigur á Keflavík í lokaumferð Pepsi deildar karla. Valsmenn vörðu titilinn frá því á síðasta ári og sendu skýr skilaboð um að þeir séu besta lið Íslands.
