Vorspá Siggu Kling – Steingeit: Leggðu frá þér vopnin

Elsku Steingeitin mín, þú ert svo ólík fjöldanum og það er alveg hið besta mál. Ólíkt fólk í ólíkum stéttum samfélagsins semur við þig og ef þér finnst einhver nískur er það mest fráhrindandi orka sem þú upplifir.

Þú átt það til að næra of mikið uppreisnarsegginn í þér, fara í stríð við menn og málefni bara til að sýna sjálfri þér þú hafir hugsjón. Leggðu frá þér vopnin, steinhættu öllu stríði, talaðu vel um alla sama hvaða skoðun þú hefur, því að með því gefur vorið þér ný verkefni, nýja vini og endurnýjun á gömlum tengslum.

Þú þarfnast alltaf einhvers í ástinni sem ögrar þér andlega og fær þig til að hugsa, sem er alveg ágætt ef þú getur séð að þú fáir eitthvað útúr því og finnir þú ert elskuð. Fólk flykkist í kringum þig svo opnaðu hurðina og hleyptu því inn því hamingjan er að banka og henni fylgja ný verkefni og manneskjur sem hjálpa þér áfram.

Þín besta list er að fanga hjarta ókunnugra því það er ómögulegt að sjá í gegnum þig, hversu spennandi er það? Þig skortir sko ekki tilboðin í ástinni og þegar þú sérð það er það  ekki spenna sem þú ert að leita að heldur varanleiki. Þá fellur allt saman eins og flís við rass þó það sé ekki spennandi máltæki. Það eru miklar breytingar tengdar þessu tímabili en tækifærin eru eins og vindurinn á Íslandi, fljót að koma og fljót að fara.

Þú ert að fara inn í tíma þar sem þú færð mikla athygli svo sannarlega gerist margt sem þér finnst merkilegt, en þín stærsta lexía í lífinu er ástin, svo ef þú elskar sjálfa þig heitt færðu rétta ást sem elskar þig endalaust.

Vorið gefur þér mikil verðlaun fyrir öll þín góðu verk og miklar og góðar fréttir af heilsu þinni og annarra í kringum þig og þú átt eftir að finna fyrir miklu þakklæti sem þýðir bara eitt, að góðar fréttir og gleði munu sigra alla erfiðleika.

Setningin þín er: Gleðin verður alltaf sterkari en allir erfiðleikar

Knús og kossar, þín Sigga Kling

Frægar Steingeitur: Guðjón Pétur Lýðsson markakóngur, Svava Johansen í Sautján, Ingibjörg Sólrún Gísladóttir, dr. Kristín Ólafsdóttir og Davíð Oddsson, Jón Gnarr, Elvis Presley, Gunnar Þórðarson, Tómas Guðbjartsson læknahetja, Lovísa Tómas, Dorrit Moussaieff forsetafrú, Þuríður Blær Jóhannsdóttir, leikkona og Reykjavíkurdóttir, Jesús og Simmi á Fabrikkunni, Óttar Proppé, Ingveldur Ægissdóttir módir og kvunndagshetja, Hendrika Waage hönnuður, Laddi, Jóhann K. Jóhannsson fréttamaður.