Lýst upp með listaverkum

Hátíðin er haldin nú í annað sinn. Hún er að mestu utandyra og umbreytir Seyðisfirði með ljósadýrð og spennandi listaverkum um leið og komu sólarinnar er fagnað eftir skammdegið,“ segir Sesselja Hlín Jónasdóttir, framkvæmdastjóri hátíðarinnar List í ljósi á Seyðisfirði sem fer fram 24. og 25. febrúar á milli klukkan 20 og 24 báða dagana.



„Bæjarbúar og gestir koma út á göturnar á sínum tíma innan þessa ramma, ganga á sínum hraða og stoppa þar sem þeir velja sér sjálfir,“ segir Sesselja. „Þar njóta þeir þess sem fyrir augu og eyru ber, allt frá stórum ljósainnsetningum niður í vídeóverk og stuttmyndir eftir innlenda og erlenda listamenn.“

Reyndar er kvikmyndahátíð sem tengist List í ljósi þegar byrjuð, að sögn Sesselju. „Það er pínu gjörningur því menningarmiðstöðinni Herðubreið er breytt í gamaldags bíósal. Þar eru fjörutíu og eitthvað myndir sýndar út vikuna og popp í boði fyrir alla,“ lýsir hún.

Sesselja er Seyðfirðingur í grunninn og hefur dvalið þar löngum stundum hjá afa sínum og ömmu þó hún ætti lögheimili syðra en flutti svo austur fyrir tveimur árum. Hún telur Seyðisfjörð höfuðborg lista og menningar.

Segir aðra hátíð haldna þar í byrjun skammdegis sem nefnist Dagar myrkurs. „Þá labba bæjarbúar saman gegnum bæinn í kolniðamyrkri og hlusta á sögur hér og þar. Mjög fallegt. En Celia Harrison, vinkona mín, sem er listrænn stjórnandi Listar í ljósi kom með þá hugmynd að fagna líka komu sólarinnar. Hátíðin heppnaðist mjög vel í fyrra og verður vonandi enn betri í ár.“

Sesselja segir gesti koma víða að, jafnvel alla leið frá Ástralíu. „Þetta er ekkert risastórt dæmi en vekur greinilega áhuga og fólk splæsir í miða hingað. Það er fallegt þegar fólk vill taka vetrarfrí og ákveður að gera það með okkur.“

Sjálf hátíðin er fjármögnuð með styrkjum og það kostar ekkert inn á hana, að sögn Sesselju. „Þetta er svo fallegt samfélag að það koma allir saman og hjálpast að þegar eitthvað svona er í gangi.“



Greinin birtist fyrst í Fréttablaðinu 21. febrúar 2017