Mammút neyddist til að afbóka tónleika vegna veðurs

„Frú Stella var með einhver leiðindi,“ segir Alexandra Baldursdóttir, gítarleikari hljómsveitarinnar Mammút og á við storminn Stellu sem gekk yfir Bandaríkin í byrjun vikunnar.

Neyðarástandi var lýst yfir í fimm ríkjum Bandaríkjanna vegna veðursins og þúsundum flugferða var aflýst. Stella setti tónleikahald Mammút úr skorðum.

„Á tímapunkti var ég í Reykjavík, trommarinn okkar í New York og rest í Austin, Texas – þar sem við áttum að vera að spila í gærkvöld. Eftir að hafa eytt gærdeginum í það að komast að því að það væri ekki séns þurftum við því miður að afbóka tónleikana í Texas þar sem við áttum að spila á afmælistónleikum Bella Union, plötufyrirtækisins okkar. Við stefnum að því að hittast í Boston í dag þar sem við erum að spila með Fufanu,“ segir Alexandra.