Merkel formlega orðin kanslaraefni Kristilegra demókrata

Kristilegir demókrataflokkar í Þýskalandi hafa nú formlega gert Angelu Merkel að kanslaraefni sínu fyrir þingkosningar sem fram fara í landinu 24. september næstkomandi.

Systurflokkarnir CDU og CSU sammældust um þetta í dag.

Flokkarnir eru langt í frá sammála í öllum málum, ef til vill sér í lagi þegar kemur að málefnum flóttamanna. Spurningin um hvernig taka skuli á málefnum flóttafólks er sérstaklega umdeild innan flokksins CSU sem starfar einvörðungu í Bæjaralandi.

Merkel mun í kosningunum berjast um kanslaraembættið við Martin Schulz, kanslaraefni Jafnaðarmanna og fyrrverandi forseta Evrópuþingsins, sem hefur mælst sterkur í skoðanakönnunum að undanförnu.

Merkel greindi frá því í nóvember að hún myndi áfram sækast eftir kanslaraembættinu sem hún tók við árið 2005.