Vinnubrögð fyrir neðan allar hellur við lokun flugbrautar

Þingflokksformaður framsóknarmanna hvatti samgönguráðherra til þess á Alþingi í dag að skoða hið snarasta hvort opna megi neyðarbraut Reykjavíkurflugvallar, - nú þegar upplýst sé að ekki sé leyfi fyrir lokun hennar. Fjallað var um málið í fréttum Stöðvar 2.

Þórunn Egilsdóttir, formaður þingflokks Framsóknarflokksins, telur unnt að opna brautina á ný en henni var lokað síðastliðið sumar eftir dóm Hæstaréttar um að ríkið hefði skuldbundið sig með samningi við borgina til að loka brautinni.

„Lausnirnar snúa meðal annars að því að byggja þannig að komist verði hjá hindrun við neyðarbrautina,“ sagði Þórunn Egilsdóttir við umræður um störf þingsins í dag.

Hún sagði að fram hefði komið í Morgunblaðinu í gær að ekki lægi fyrir leyfi fyrir lokun brautarinnar þar sem áhættumat hafi ekki verið gert. 

Hún vitnaði til þeirrar niðurstöðu Samgöngustofu að áhættumat Isavia hefði verið gallað. Það hefði ekki náð til áhrifa á flugvallakerfi landsins í heild sinni, neyðarskipulags almannavarna né áhrifa á sjúkraflutninga. 

„Þá liggur fyrir sú niðurstaða Alþjóðaflugmálastofnunarinnar að forsendur útreiknings á nothæfisstuðli voru rangar í skýrslu Eflu en Félag íslenskra atvinnuflugmanna sendi bréf þessa efnis til samgönguráðherra um miðjan mars síðastliðinn. 

Hæstvirtur forseti!

Vinnubrögð í þessu mikilvæga máli virðast hafa verið fyrir neðan allar hellur,“ sagði Þórunn. 

Hún minnti á að fyrir Alþingi lægi þingsályktunartillaga um opnun brautarinnar. 

„Ég hvet ráðherra og viðeigandi yfirvöld að taka málið til skoðunar hið snarasta.“