Segir pólítíska andstöðu gegn flugvelli birtast innan Isavia

Einn fulltrúa í áhættumatsnefnd um Reykjavíkurflugvöll, sem Isavia leysti upp fyrir jól, segir pólitíska andstöðu gegn flugvellinum birtast sterkt innan Isavia og forstjóri þess sé einbeittur flugvallarandstæðingur. Þá segir hann forstjóra Samgöngustofu sömuleiðis vanhæfan til að fjalla um málið.

„Við vorum bara reknir. Áhættumatsnefndin okkar var leyst upp,“ segir Þorkell Ásgeir Jóhannsson, einn nefndarmanna áhættumatshópsins. Hann er þjálfunarflugstjóri Mýflugs og var að koma úr sjúkraflugi frá Þórshöfn á Langanesi í morgun þegar Stöð 2 ræddi við hann á Reykjavíkurflugvelli.

Niðurstaða áhættumatsins sem stefndi í innan hópsins um braut 06/24, svokallaða neyðarbraut, var þessi, að sögn Þorkels: „Að niðurlagning þessarar flugbrautar var óásættanleg vegna aukinnar áhættu.”

Ráðamenn Isavia hafa útskýrt sína hlið meðal annars með því að gamli áhættumatshópurinn hafi véfengt ný mæligögn, viljað byggja á gömlum og úreltum veðurupplýsingum, einnig huglægu mati, - auk þess séu þetta hagsmunaaðilar.

„Við erum ekkert endilega að hafna þessum gögnum og útreikningum Eflu. Við viljum bara sjá vinnuna kláraða og hefðum verið tilbúnir að taka þátt í því. En það þóknaðist ekki Isavia, því miður,” svarar Þorkell.

En er eðlilegt að svona vinnuhópur sé skipaður fulltrúum hagsmunaaðila, eins og Flugfélags Íslands, Landhelgisgæslu, einkaflugs og sjúkraflugs?

„Það erum við sem höfum reynsluna og við erum þeir sem erum ábyrgir fyrir því ef eitthvað kemur fyrir, í hliðarvindslendingu til dæmis. Hversvegna má ekki hlusta á okkur?”

Verkfræðistofuna Eflu telur hann vanhæfa vegna tengsla forstjórans við Valsmenn.

„Efla er eins vanhæf og hún getur verið til að koma að þessum útreikningum, - á svona viðkvæmu álitamáli. Það er alveg á hreinu, þetta er ekki hlutlaus aðili.”

Þorkell segist ekki treysta Isavia.

„Því miður, þá geri ég það ekki. Það er greinilega mjög sterkur undirliggjandi pólitískur vilji til þess að vinna gegn þessum flugvelli. Hann kemur mjög sterkt í gegnum Isavia. Og við höfum fundið svo átakanlega fyrir því í gegnum þessa vinnu í áhættumatsnefndinni. Þessu fyrirtæki, Isavia, er stjórnað af manni sem er klár og einbeittur flugvallarandstæðingur. Það sést í öllum hans gerðum.”

Hann kveðst heldur ekki treysta forstjóra Samgöngustofu, sem nú fjallar um málið.

„Forstjóri Samgöngustofu, fyrrverandi borgarstjóri, er alveg klár flugvallarandstæðingur líka, og mig langar bara að fá einhverja tryggingu fyrir því að samskonar meðvirkni eigi sér ekki stað innandyra þar líka.”

-Ertu þá að segja að forstjóri Samgöngustofu sé hugsanlega vanhæfur?

„Já, ég er að segja það. Hann er það klárlega að mínu mati.”

Isavia hafnaði boði fréttastofu í dag um viðtal um ástæður þess að áhættumatshópurinn var lagður niður. Talsmaður Isavia vill þó hnykkja á því, sem áður hefur komið fram í yfirlýsingu Isavia, að ósamræmi hafi verið komið upp milli nákvæmra mæligagna og huglægs mats og að hagsmunaaðilar hafi véfengt ný ítarleg gögn. Hafði ferlið þá tekið nærri ár í framkvæmd. Í framhaldinu hafi verið ákveðið að endurtaka áhættumatið með sérfræðingum Isavia.