Þorvaldur endurkjörinn formaður Alþýðufylkingarinnar

Þorvaldur Þorvaldsson var endurkjörinn formaður Alþýðufylkingarinnar á þriðja landsfundi flokksins sem haldinn var í Reykjavík um liðna helgi.

Í tilkynningu frá flokknum segir að helstu mál sem hafi verið tekin fyrir á landsfundi hafi snúið að flokksstarfi og skipulagi.

„Nýlega voru stofnuð svæðisfélög innan flokksins á höðborgarsvæðinu og í Norðaustukjördæmi. Stefnt er að því að aðildarfélög flokksins spanni allt landið fyrir sumarið. Skipaðir voru starfshópar til að undirbúa útgáfu málgagns á netinu, til að móta og samræma stefnu flokksins í verkalýðsmálum og til stefnumótunar í sveitarstjórnarmálum.

Þorvaldur Þorvaldsson var endurkjörinn formaður og Vésteinn Valgarðsson varaformaður. Aðrir sem kjörnir voru í framkvæmdastjórn eru: Elín Helgadóttir sjúkraliði, Erna Lína Baldvinsdóttir nemi, Guðmundur Sighvatsson byggingafræðingur, Tamila Gámez Garcell kennari og Þorvarður B. Kjartansson háskólanemi.

Fjórir fulltrúar voru kjörnir í miðstjórn en að öðru leyti er miðstjórnin skipuð fulltrúum svæðisfélaganna auk framkvæmdastjórnar. Loks var samþykkt tillaga um að gera Ólaf Þ. Jónsson, fyrrum vitavörð með fleiru, heiðursfélaga Alþýðufylkingarinnar.

Líflegar umræður voru á fundinum og tóku allir fundarmenn til máls. Þá var mikil samstaða um allar afgreiðslur og ríkti bjartsýni um baráttumál og uppbyggingu flokksins,“ segir í tilkynningunni.

Alþýðufylkingin var stofnuð árið 2013. Flokkurinn bauð fram í öllum kjördæmunum nema Norðvesturkjördæmi í þingkosningunum á síðasta ári og hlaut samtals um 0,3 prósent atkvæða. 

Í viðhengi má sjá ályktanir landsfundarins.