Tveir aðstoðarmenn orðaðir við oddvitasæti í borgarstjórn

Að minnsta kosti tveir aðstoðarmenn ráðherra Sjálfstæðisflokksins eru orðaðir við framboð í 1. sæti á lista Sjálfstæðisflokksins í komandi borgarstjórnarkosningum. Þetta eru þau Borgar Þór Einarsson og Svanhildur Hólm Valsdóttir. Borgar er aðstoðarmaður Guðlaugs Þórs Þórðarsonar utanríkisráðherra en Svanhildur er aðstoðarmaður Bjarna Benediktssonar forsætisráðherra.

Borgarstjórnarkosningar fara fram næsta vor og eru Sjálfstæðismenn líkt og forystumenn í öðrum stjórnmálaflokkum farnir að huga að því hvernig staðið verður að uppstillingu á lista. Fréttablaðið greindi frá því í gær að stjórn fulltrúaráðs Varðar hefði samþykkt að leggja til að fram fari leiðtogaval í aðdraganda kosninganna. Dagsetningin 21. október næstkomandi hefur verið nefnd. Boða þarf til fundar í fulltrúaráðinu og samþykkja tillöguna þar, eigi slík tillaga að verða að veruleika.

„Ég hef íhugað þetta en ekki tekið neina ákvörðun enn þá,“ segir Borgar Þór Einarsson. Ekki liggi fyrir hvenær hann taki endanlega ákvörðun en ljóst sé að dagsetning leiðtogavalsins, standist hún, stytti þann tíma nokkuð. Svanhildur Hólm baðst undan viðtali þegar Fréttablaðið spurði hana hvort hún myndi gefa kost á sér.

Halldór Halldórsson, núverandi oddviti Sjálfstæðisflokksins í borgar­stjórn, segist hafa gefið yfirlýsingu um það í vor að hann hygðist sækjast áfram eftir oddvitasætinu. „Það hefur ekkert breyst hjá mér síðan ég gaf þessa yfirlýsingu út í vor, en vika er langur tími í póli­tík,“ segir Halldór.

Aðrir núverandi borgarfulltrúar eru einnig að skoða stöðu sína. Þannig hefur Fréttablaðið fengið staðfest að Kjartan Magnússon borgarfulltrúi skoði stöðu sína og það á einnig við um Áslaugu Friðriksdóttur borgarfulltrúa. „Ég er að hugsa málið,“ segir Áslaug en bendir jafnframt á að mál muni væntanlega skýrast betur þegar búið er að ákveða endanlega hvernig verður staðið að vali listans.

Ragnheiður Ríkharðsdóttir og Eyþór Arnalds hafa einnig verið nefnd í tengslum við uppstillingu á listanum en Ragnheiður þvertekur algjörlega fyrir það að hún muni gefa kost á sér. Ekki náðist í Eyþór við vinnslu fréttarinnar þrátt fyrir ítrekaðar tilraunir.