Segir að ríkið þurfi annað hvort að einkavæða allt eða ekkert

Forstjóri ISAVIA segir óráðlegt að einkavæða einungis hluta af rekstri Keflavíkurflugvallar eins og hugmyndir eru nú uppi um að gera. Hann segir betra að stíga skrefið til fulls eða sleppa þessu með öllu.

Meirihluti fjárlaganefndar Alþingis vill skoða hvort rétt sé að selja flugstöðina í Keflavík að hluta og nota peningana í endurbætur á vegakerfinu. Þetta kemur fram áliti meirihlutans á fjármálaáætlun ríkisstjórnarinnar.

Haraldur Benediktsson formaður fjárlaganefndar sagði í þættinum Víglínan á Stöð 2 á laugardag að ekki stæði til að einkavæða allan reksturinn í Keflavík.

„Það sem við erum að horfa á er verslunarmiðstöðin sem er í flugstöðunni. Við erum bara að horfa á þetta verslunarhúsnæði sem ríkið hefur þarna ákveðið að reka. Getum við talað um að taka þá fjármuni sem þarna eru bundnir og breyta þeim í vegi og hafnir?“ sagði Haraldur.

Björn Óli Hauksson forstjóri ISAVIA segir vel hægt að skoða aðkomu einkaðila að rekstrinum í Keflavík en þá þurfi að liggja fyrir skýrar línur frá ríkinu.

"Ef við horfum til útlanda þá getum við séð að Kaupmannahafnarflugvöllur er t.d. einkavæddur og í eigu kanadískra aðila. Það eru sumir sem setja svona flugvelli á markað og selja hlutabréf í honum. Þetta er svona dæmi um það sem menn hafa verið að gera. Ég ætla ekki að taka afstöðu til þess hvernig eigandi ætlar að stjórnar því,“ segir Björn. 

Hann segir menn þurfi þá að vera tilbúnir að fara alla leið í einkavæðingu.

„Ég myndi hafa áhyggjur af því ef við myndum einkavæða búta úr starfseminni. Annað hvort þurfa menn að stíga skrefið til fulls eða ekki,“ segir Björn. „Það væri sérstakt ef við færum að selja einhverja bita af flugstöðinni sem eru nauðsynlegir fyrir rekstur hennar,“ segir Björn.