Innlent

Kannað verði hvort hringir á Nesinu séu írskt landnám

Kristján Már Unnarsson skrifar
Merkar fornminjar gætu leynst nánast framan við nefið á borgarbúum. Mannvirkjajarðfræðingur hvetur til þess að kannað verði hvort dularfullir hringir á Seltjarnarnesi séu leifar írskra mannvirkja frá upphafi Íslandsbyggðar. Þetta kom fram í þættinum Landnemarnir og í fréttum Stöðvar 2. 

Vestan Nesstofu á Seltjarnarnesi bendir Þorgeir S. Helgason mannvirkjajarðfræðingur okkur á hvar sjá megi stóra hringi í landslaginu, sem hann segir að hafi ekki uppgötvast fyrr en eftir 1980.

„Og ekki fyrr en menn sáu þetta úr lofti," segir Þorgeir.

Þorgeir S. Helgason mannvirkjajarðfræðingur.Stöð 2/Friðrik Þór Halldórsson.
„Enginn hafði tekið eftir þessu, þar á meðal gamla konan sem bjó hér í Nesstofu alla sína tíð, í 70 ár, - þegar við töluðum við hana, - hún kannaðist ekkert við þá,“ segir Þorgeir. 

Við sérstakar aðstæður sjást þessir hringlaga garðar vel úr lofti og þeir eru frá tíu metrum og upp í fimmtíu metrar í þvermál. Þjóðminjasafnið aldursgreindi garðana fyrir rúmum tuttugu árum og þá kom í ljós að þeir voru hlaðnir rétt eftir að landnámsöskulagið féll. 

„Þetta er fljótlega eftir það. Þannig að þetta er alveg frá upphafi Íslandsbyggðar.“

Stærstu hringirnir eru um 50 metrar í þvermál. Á Bretlandseyjum hlóðu menn slíka hringlaga garða umhverfis bústaði.Mynd/Þorgeir S. Helgason.
Þorgeir hvetur til þess að hringirnir verði rannsakaðir nánar og sérstaklega með þá tilgátu í huga að þeir geti verið leifar af keltneskum mannvirkjum, sem þekktust á Bretlandseyjum um það leyti sem Ísland byggðist.

„Á Írlandi var þetta byggingarhefðin alveg fram yfir 1200. Menn byggðu garð í þessu þvermáli, eins og þetta sem við sjáum. En íveruhúsin, eða gripahús, voru inni í því,“ segir Þorgeir.

Hringirnir eru vestan við Nesstofu og sjást best úr lofti við sérstakar aðstæður.Mynd/Þorgeir S. Helgason.
Þorvaldur Friðriksson, fréttamaður og fornleifafræðingur, hefur lengi haldið því fram að keltnesk áhrif séu vanmetin í Íslandssögunni. Hann hefur bent á það að í einni útgáfu Landnámu komi fram að Gufa Ketilsson, sonur landnámsmanns Akraness, Ketils Bresasonar, sem kom frá Írlandi, hafi búið á Seltjarnarnesi.

Þorvaldur Friðriksson, fréttamaður og fornleifafræðingur.Stöð 2/Friðrik Þór Halldórsson.
„Gufa, sem var hér, var annarrar kynslóðar Íri. En eitt það fyrsta sem Ingólfur Arnarson gerir, Norðmaðurinn, þegar hann kemur hingað, er að reka burtu Gufu Ketilsson. 

Og hversvegna í ósköpunum hefði landnámsmaðurinn norski, Ingólfur Arnarson, þurft að reka burtu Gufu Ketilsson hafi ekki Gufa Ketilsson verið hérna fyrir þegar hann kom?“ spyr Þorvaldur.

Á þessari ljósmynd sjást hringirnir vel vestan byggðarinnar á Seltjarnarnesi.Mynd/Þorgeir S. Helgason.

Tengdar fréttir




Fleiri fréttir

Sjá meira


×