Gerir þrif spennandi

Ég er oft spurð hvernig ég nái að gera þrif spennandi en það er kannski vegna þess að ég hef alltaf haft gaman af því að þrífa og hafa fínt í kringum mig. Ég hef líka unnið við þrif af og til í gegnum tíðina, svo þetta er ekki bara áhugamál,“ segir Sigrún Sigurpálsdóttir, sem hefur verið með opið Snapchat í tæp tvö ár, og er með þúsundir fylgjenda.

„Ég tók fljótt eftir því að allt sem ég sýndi varðandi þrif vakti mikla athygli. Ég fæ fjölda fyrirspurna frá fólki varðandi þrif, eins og hvernig sé best að þrífa teppi í bílum, ná kertavaxi úr fötum eða blettum úr sófum. Oftast get ég svarað fólki strax en ef ekki, finn ég út úr því og svara eins fljótt og ég get,“ segir Sigrún.

Spurð hvar hún fái allan þennan hagnýta fróðleik segist Sigrún einna helst skoða Pinterest en þar sé hafsjór af alls konar upplýsingum sem koma að góðu gagni. „Ég er ekki að finna þetta upp sjálf en ég hef komið mér upp ágætri rútínu varðandi þrif og þvott sem hentar mér vel.“

Fer ekki að sofa með húsið í rúst

Sigrún segist ekki vera með stíft plan varðandi þrif heldur taka þau eftir hendinni en þó sé regla að skipta um á öllum rúmum á föstudögum. „Mér finnst lykil­atriði að ganga vel frá öllu á kvöldin og fer ekki að sofa með allt húsið í rúst. Ég geng t.d. frá öllu lauslegu dóti og set á sinn stað og enda síðan daginn á að strjúka yfir eldhúsborðin og vaskinn því það er einfaldlega skemmtilegra að fá sér morgunmat í hreinu umhverfi,“ segir hún.

Þvottar og þrif

Um klukkutími fer í þrif og þvotta daglega, en eins og stendur er Sigrún í fæðingarorlofi. Hún býr á Egilsstöðum, ásamt eiginmanni og fjórum börnum.

„Ég þvæ að lágmarki tvær vélar á dag. Mér finnst best að brjóta saman allan hreinan þvott um leið og ég tek hann af snúrunum og geng svo strax frá honum. Ég passa vel upp á að safna ekki hreinum þvotti í hrúgu því hann krumpast við það og það dregst oft enn lengur að ganga frá þvottinum.“

Sigrún notar helst hreinsilög sem hún býr til sjálf við þrifin. „Ég blanda einum hluta af spritti á móti tveimur hlutum af köldu vatni og set í spreybrúsa. Mér finnst þessi blanda mjög góð og nota við nær öll þrif. Hún leysir vel upp öll óhreinindi. Í eldhúsinu nota ég blöndu af uppþvottalegi og vatni. Svo finnst mér mikilvægt að eiga alltaf hreinsikrem sem heitir Pink-stuff. Það er besta hreinsikrem sem ég hef prófað. Það er gott á alla vaska og er líka fínt í klósettskálina. Tuskurnar sem ég nota eru frá Blindrastofunni og eru úr örtrefjum."

Þeir sem hafa áhuga geta fylgst með Sigrúnu Sigurpálsdóttur á Snapchat undir nafninu Sigrunsigurpals eða í þrifatips hópnum á facebook.