Trump hefur hrapað um 92 sæti á lista Forbes

Donald Trump Bandaríkjaforseti hefur fallið um 92 sæti á lista Forbes yfir auðugustu Bandaríkjamennina. The Guardian greinir frá.

Samkvæmt Forbes eru auðæfi forsetans nú metin á 3,1 milljarð Bandaríkjadala en þau voru metin á 3,7 milljarða dala. 3,1 milljarður dala samsvarar tæplega 330 milljörðum íslenskra króna.

Trump er nú í 248. sæti á lista Forbes en samvæmt tímaritinu hefur verðgildi nokkurra fasteigna forsetans á Manhattan rýrnað frá því í fyrra. Microsoft-mógúllinn Bill Gates trónir á toppnum líkt og síðustu ár en á hæla hans kemur Jeff Bezos, framkvæmdastjóri Amazon. Bezos skaust fram úr Gates þann 27. júlí síðastliðinn en forskotið varði aðeins í fáeinar klukkustundir.

Donald Trump talaði fjálglega um auðæfi sín í aðdraganda forsetakosninganna á síðasta ári. Hann fullyrti margsinnis að auðæfi sín væru metin á um níu milljarða Bandaríkjadala sem kom ekki heim og saman við upplýsingar Forbes.